VM-ertoqarnissaanut aalajangiisoqareersoq: IHF-imi præsidenti assuarnartuliorpoq
Kalaallit Nunaannut eqquisumik Nunat tamalaat assammik arsartartut kattuffiata IHF-ip præsidentia assuarnartuliorpoq, timersornerup tungaatigut isummersortartoq oqarpoq.
Kalaallit Nunaat assammik arsarnermi nunarsuarmi pissartanngorniunnermi peqataatinneqarsimasussaagaluarpoq.
Ekstra Bladep timersornikkut isummersortartua Jan Jensen isumaqarpoq. Nunat tamalaat assammik arsartartut kattuffissuata USA-p VM-eqataanissaa toqqarpaa sapaatip akunnerata siuliani.
Aalajangiineq assuarnartuliornerusoq Jan Jensen isumaqarpoq. Tamannalu IHF-ip præsidentia Hassan Moustafa akisussaaffigigaa isumaqarpoq.
- Pisoq tamaat kusanaalluinnarpoq. Kalaallit Nunaat assammik arsallaqqinnerugaluarpoq. Aalajangiinermut aningaasat tunngaviigineqarput, aatsaallu taamatut aalajangertoqalinngilaq, Jan Jensen Sermitsiaq.AG-mut oqarpoq.
Aningaasat
USA-p VM-imut peqataatinneratigut IHF aningaasannalluarsinnaanera pissutigalugu toqqarneqartoq iusmaqarpoq. USA-p aamma 2018-mi aaqqissuisuusussaanera pissutigalugu toqqarneqarneranut aamma tunngaviusoq isumaqarpoq.
- Kalaallit Nunaat taamaasilluni iliuuseqarpallaarsinnaanngilaq. Allanngortinneqarsinnaanngitsumik aalajangiisoqareerpoq, Hassan Moustafa tassani qitiulluinnarptumik aalajangiisuuvoq.
Aalajangiineq timersuummut ajoqqutaasoq isumaqarpoq.
Aalajangiussaq allanngortinneqarsinnaanngotsoq
Aalajangerneq pillugu assammik arsartartut kattuffiata, TAAK-p, akerlilerniarlugu suaaruteqareerpoq.
- Kalaallit Nunaatali akerliunera angusaqarfiuallaassanngitsoq naatsorsuutigaara, tamanna uggornaraluarpoq, kisianni piviusoq taamaappoq, Jan Jensen oqarpoq.
Hassan Moustafa IHF-imi præsidentiujunnaarsinniarlugu qanoq iliortoqarsinnaava?
- Ukiuni amerlavallaarujussuartuni præsidentiusareerpoq. Præsidentit ukiut 20-t sinnerlugit præsidentiusut qaqutigoorput. Tamanna inissaminiinngilluinnarpoq. Præsidentit qinigaaffinni pingasuniluunniit atuuffeqarsinnaasut IHF aalajangiisariaqaraluarpoq, Hassan Moustafa qinigaaffinni tallimani atuuffeqareerpoq, tamanna sivisuallaarujussuarpoq, Jan Jensen oqarpoq.