Vivian pissaanermik takutitsisoq: Naalakkersuisut isumaqatiginninniarput

Illersornissaq pillugu isumaqatigiissutissamut IA-p kissaatini arlallit pingasunngornermi saqqummiuppai. Partii folketingimut ilaasortaatitaqarlunilu Naalakkersuisuni Siumut suleqatigaat.

Naalakkersuisut partiinut tamanut siunnersuuteqartitsinissamik qaaqqusimmata IA-p kissaatini saqqummiukkai, IA-p nunanut allanut tunngasunut oqaaseqartartuata Mariia Simonsenip saqqummiinermini oqaatigaa.

Kisianni arlaatigut ajortoqarsimavoq. Tassami Nunanut Allanut Tunngasunut, Inuussutissarsiornermut Niuernermullu Naalakkersuisoq, Vivian Motzfeldt (S), Folketingimut ilaasortat allalluunniit pinnatik, Naalakkersuisut illersornissaq pillugu isumaqatigiissutissamut isumaqatiginninniartussaasut tamanut nalunaarutigisariaqarlugu naqissusertariaqarlugu misigisimavoq.

- Kunngeqarfimmi illersornissaq pillugu isumaqatiginninniarnissami erseqqissaassutigissavara, Naalakkersuisut tassaasut Nunarput sinnerlugu danskit naalakkersuisuinut isumaqatiginninniartuusussat. Nunarput sinnerlugu taamaallaat Naalakkersuisut isumaqatigiinninniarsinnaapput, Naalakkersuisut nittartagaanni tusagassiuutinut nalunaarummi taama oqarpoq.

Taassuma partiia Siumut Inatsisartunilu partiit allat illersornissaq pillugu isumaqatigiissutissamut siunnersuutinik pisortatigoortumik saqqummiussaqarnikuunngillat, Naalakkersuisut aamma saqqummiussaqanngillat.

Vivian Motzfeldtilli nalunaarut naapertorlugu partiinit siunnersuuteqartoqarnera nuannaarutigaa:

- Taamak oqareerlunga, oqaatigilara Inatsisartuni partiit isummersornerat tikilluaqqugakku, qulequtaq pingaarutilik tamatsinnut tunngassuteqartoq immersueqatigiittariaqarnermik pisussaaffiliivoq.

Folketingimut ilaasortat nammineq suliaminnik isumaqatiginninniartarput

IA-p pingasunngornermi saqqummiinerminni oqaatigisaata assinganik, partiit Folketingimi ilaasortaatitaqartut toqqaannartumik danskit naalakkersuisuinut oqaloqateqarnissamik periarfissaqartut, taamaaliornikkut partiitut pingaartitaminnik sulissuteqarsinnaasut ilisimatitsissutigaa.

- Siumut Inuit Ataqatigiillu taamaaliorsinnaapput tamarmik Folketingimi ilaasortaatitaqaramik. Oqaatigeqqissavarali Nunarput sinnerlugu Naalakkersuisut tassaammata kisiartaallutik pisortatigoortumik oqartussaassuseqarlutillu akisussaaffeqartut danskit naalakkersuisuinut isumaqatiginninniassallutik. Taakkuupput tamat oqartussaaneranni ingerlatsiviusumi malitassat aqqutillu eqqortut.

Partiini naalakkersuisoqataasunit imaluunniit allanit Naalakkersuisut avaqqullugit danskit naalakkersuisuinut isumaqatiginninniartoqarsimaneranik, Vivian Motzfeldt isumaqarnersoq, Sermitsiaq.AG-p oqaaseqartinniarlugu sulissutigaa.

Aasaanerata kingorna ersarinnerusumik nalunaaruteqartoqassasoq

Naalakkersuisut danskit naalakkersuisuinut illersornissaq pillugu isumaqatigiissutissamut aallarniutaasumik tunngavissaminnik tunniussaqareernikuusut, aamma danskit naalakkersuisuisa tunngavissat taakku tigoreeraat, tamanna isertuussamik Inatsisartuni Nunanut Allanut Sillimaniarnermullu Ataatsimiititaliamut ilisimatitsissutigineqarsimasoq, Vivian Motzfeldt nalunaarummi aamma allappoq.

- Piffissami matumani tamanna pillugu isertuussisoqarnissaanik pisariaqartitsisoqarpoq, Naalakkersuisullu tusagassiorfiit aqqutigalugit isumaqatiginninniartanngillat, taanna oqarpoq.

Danmarkimi illersornissaq pillugu ministeriugallartorlu Troels Lund Poulsen ajunngilluinnartumik oqaloqatigiinnerit ingerlanneqartut aamma oqaatigaa.

- Illersornissaq pillugu isumaqatiginninniarnissami naatsorsuutigaarput siullertut tamakkiisumik isiginnittumik pingaarnertut inissinneqartariaqartut siulliullugit inissinneqarumaartut, aasallu kingorna immikkoortut ataasiakkaarlugit qulequttanut aalajangersimasunut tunngasut itinerusumik tikinneqarumaartut, Motzfeldt oqarpoq.