Vivian Motzfeldt: Nunanut allanut iliuusissatut pilersaarut piariilivippoq
Nunanut allanut naalakkersuisoq, Vivian Motzfeldt (S) Sermitsiaq.AG-mut erseqqissaavoq nunanut allanut iliuusissatut pilersaarut piariilivissoq. Pilersaarut taanna Lars Løkke Rasmussen-ip Kunngeqarfiup Danmark-ip issittumi periusissiassaanut atorfissaqartillugu utaqqineragaraa.
Nunanut allanut Naalakkersuisoq, Vivian Motzfeldt (S) naalakkersuisutut ivertinneqaramili nalinginnaanngitsumik ulapputeqarpoq nunanut allanut iliuusissatut pilersaarut nutaaq isumaqatigiinniutigalugu:
- Inuiaqatigiinnut kalaallinut assut pingaaruteqarpoq iliuusissatut pilersaarut taamak pingaaruteqartigisoq inuiaqatigiit ataatsimoorussinissaat aammalu inuiaqatigiit ataatsimoortut sinnerlugit avammut sammisunik oqaaseqartarnissarput assut pingaaruteqarpoq. Taamaammat Naalakkersuisut pingaartippaat, Inatsisartuni partiit tamarmik iliuusissatut pilersaarummut tunuliaqutaanissaat, Vivian Motzfeldt oqarpoq.
Taassuma oqaluttuaraa pilersaarutissaq kalaallisut qallunaatullu naammassineqareersoq, maannalu imarisaata pitsaassusaa naalakkersuisoqarfimminit misissoqqissaarneqartoq. Tamanna pereerpat partiinut tunniuteqqinneqassamaarpoq, taamaaliornikkut pilersaarut avammut saqqummiunneqartinnagu partiit ilanngukkusutatik pillugit siunnersuuteqarnissaminnut naggammik periarfissaqartinneqassasut Vivian erseqqissaavoq.
Sakkutooqarnikkut inerisaasoqarnissaanut Kalaallit Nunaat ammavoq
Piffissami kingullermi Ruslandip Ukrainemut sorsunnerata kingunerisaanik Nunatta sakkutooqarnikkut inissisimanera pillugu Naalakkersuisut nalilersueqqinnissaminnik avaqqutsisinnaajunnaarsinneqarsimasut Vivian Motzfeldt oqaluttuarpoq.
- Danmark peqatigalugu issittumi piginnaasanut annertusaasoqarnissaa pillugu isumaqatigiissummik atsioqatigiinnikuuvugut, tassungalu atatillugu Kangerlussuup, mittarfissuit nutaat atuutilernernerinut atatillugu, sakkutooqarnikkut atorneqarsinnaanissaa illersornissaqarfimmit kissaatigisaanikuuvoq. Tassunga tunngatillugu Kalaallit Nunatta tungaaniit erseqqissaatiginikuuarput Kangerlussuarmi mittarfiup sakkutooqarnikkut atorneqarnerata saniatigut aamma inunnik angalassinermut atorneqalissasoq (dual-use). Taamaammat aap, sakkutooqarnikkut ingerlatsinermut nunarput annertunerusumik atorneqarsinnaalernissaanut Kalaallit Nunatsinnit piareersimassaagut, Vivian Motzfeldt oqarpoq.
Qanoq annertutigisumik qanorlu ilusilimmik inerisaasoqassanersoq paasinarsissaaq illersornissaq pillugu isumaqatigiissutissap ilusilerneqarnerani, taanna isumaqatigiissutissaq upernaaq manna naammassillugu danskit naalakkersuisuinit naammassineqartussatut naatsorsuutigineqarpoq.
Danmarkimik suleqateqarneq pitsaasup tungaanut saannikuuvoq
Nunanut allanut sillimaniarnermullu tunngatillugu namminerisaminik ilusilersuisinnaanera suli killeqarpoq. Tassa Naalagaaffeqatigiinnerup aqqani Danmark aamma Savalimmiut Tunngaviusumik Inatsisit najoqqutaralugu ilusilersorneqartussaammat.
Piffissap ingerlanerani oqaluttuarisaanermut kingumut qissimissagaanni Danmark nunatsinnit kalattooqatiginiarsaralugu qiteqatigiuminaassinnaasaraluartoq, Danmark ukiuni kingulliunerusuni kalattooqataanissaminut sungiusarluartalersimavoq qiteqatigiuminarsisimallunilu, tassami Vivian Motzfeldt-ip peqatigiinneq pitsaasup tungaanut ingerlalersimasoq naqissuserpaa:
- Ukiuni kingulliunerusuni Danmarkip tungaanit paasinninneq suleqatiginnikkusunnerlu annertusiartortut misigaarput, tassalu uagut Kalaallit Nunaanni Issittumilu inuusugut aallaavipput allarluinnaasoq aammalu pisariaqartitagut allaasut pillugit paasinninneq annertusiartortutut oqaatigineqarsinnaavoq, tassungalu atatillugu Nunatta namminersulernissaanik siunniussaqarluta sulissutiginninnerput aamma ataqqineqartutut misinnarami. Soorunami ilaatigut peqatigiinnitsinni aporfissanik naammattoorsisaraluarluta, aammalu ilaatigut qanoq sunillu immitsinnut naatsorsuutiginnissinnaanerluta pillugu utaqqisinnaassutsip killeqartinneqarsinnaasarneranik nalaataqartaraluarluta tusaaneqartutut ataqqineqartutullu misigisimaneq piulersimavoq, Vivian Motzfeldt erseqqissaavoq.
Nunanut allanut iliuusissatut pilersaarut aamma issittumi pilersaarummik imaqarpoq
Lars Løkke Rasmussen sapaatip akunnera manna Nuummi tikeraaqqammerpoq, tassungalu atatillugu oqaluttuarpoq Kunngeqarfiup Danmarkip issittumi periusissiassaanut Kalaallit Nunaanniit ilanngutsikkusutat danskit naalakkersuisuisa utaqqimaaraat. Tamannalu tassa maanna naammassisinnaanngulersoq Motzfeldt matumani erseqqissaavoq.
Taassuma erseqqissaatigaa, Danmark tusaaniarnerulerlunilu suleqatikkuminarsinerulersimagaluartoq, suli pingaaruteqartoq Kalaallit Nunaata nammineq nunanut allanut sillimaniarnermullu tunngatillugu suleriaatsiminik ilusilersuinissaa, taannalu nunanut allanut iliuusissatut pilersaarummi isumannaarneqassasoq ilanngullugu erseqqissaalluni:
- Eqqaamaneqassaaq uagununa issittumi najugaqartugut, taamaammat kunngeqarfimmi ataatsimooraluarluta, uagut nammineerluta issittumi qanoq piriuseqarusunnerluta ilusilersugassaraarput taannalu nunanut allanut tunngatillugu iliuusissatut pilersaarutitsinnut ilaassaaq. Soorunami suleqatigiissaagut aammalu qanoq immitsinnut naatsorsuutiginneqatigiinnerluta isumasioqatigiittassaagut, uangali isumaqarpunga immitsinnut arlaannaatigulluunniit kimigiiserfigissanngitsugut, nunanut allanut Naalakkersuisoq Vivian Motzfeldt erseqqissaavoq aperineqarami Kunngeqarfip Danmarkip issittumi periusissaanut atatillugu Danmark qanoq sivisutigisumik suli utaqqisinneqassanersoq.