Vivian Motzfeldt: »Løkkep ersarissumik akerlilerpaatigut«
Danskit Issittumut periusissiornissamik ujartuipput. Naalakkersuisulli naapertorlugit tamanna »ilungersunarsinnaavoq« periuseq Issittumi ambassadørimik toqqaanertut ippat kalaallit tusaaniarneqaratik.
Danskit naalakkersuisuisa utaqqikatappaat Nuummi naalakkersuinermik suliallit kunngeqarfimmut tamarmut Issittumut periusissiamut nunaamut ilanngussinissaat.
Aviisi AG taama allappoq.
- Issittumut periusissiat atorfissaqartilluinnarparput, naalagaaffeqatigiinni illoqarfiit pingaarnersaasa pingasut suleqatigiillutik isumaqatigiissutigisaannik, nunanut allanut tunngasunut ministeri Lars Løkke Rasmussen (M) sapaatip-akunnerani qaangiuttumi AG-mi allaaserisatsituut Folketingip oqaluttuarfianit oqarpoq.
Tamatuma kingorna AG ilisimatinneqarpoq Naalakkersuisut nunanut allanut politikkissamut periusissiaq naammassileraat, taamaattumillu ungasinngitsukkut Inatsisartunut saqqummiunneqassasoq. Siunnersuutaassaaq ilaatigut Kalaallit Issittumi anguniagaannik, attavigisaannik angorusutaannillu tikkuussisoq. Apeqqutaalerporli amerlanerussuteqarlutik naalakkersuisoqatigiit (IA Siumullu) Issittumut periusissiamik Kalaallit, danskit Savalimmiormiullu akunnerminni ataatsimoorlutik ilusilersugaannik tunniusseqataanissaminnut piumassuseqarnersut.
AG-mit nunanut allanut tunngasunut Naalakkersuisoq Vivian Motzfeldt (S) tamanna pillugu aperaarput:
- Naalakkersuisut isumaqatigaat naalagaaffeqatigiit ataatsimoortumik Issittumut periusissiaqarnissaat?
- Apeqqutip taassuma nunatsinni partiinit isummerfigineqarnissaa Naalakkersuisunut pingaartuuvoq. Partiit tamaasa tamanna pillugu oqaloqatigereerutsigit apeqqut pillugu oqaaseqarsinnaassaagut. Kisianni soorunami Issittumi Ambassadørimik toqqaanertut ittumik periuseqartoqassappat tamanna ilungersunarsinnaavoq, Vivian Motzfeldt oqarpoq.
Aviisimi AG-mi atuarnerusinnaavutit. Aviisi uani pissarsiariuk:
