Vivian Motzfeldt: Isumaqatigiissut sunniuteqarfigaarput
Issittumi piginnaasanik annertusaanermi Kalaallit Nunaanni tunngavissanik isumaqatigiissut sooq taama sivisutigisumik suliarineqarsimanersoq illuatungiliuttunit apeqquserneqarpoq. Siunnersuummi ukioq kingullermi saqqummiunneqartoq allannguuteqangaarsimanngitsoq isumaqarput. Isumaqatigiissulli Nunatsinnut iluaqutaassasoq Vivian Motzfeldtip tikkuarpaa.
Illersornissaq pillugu missingersuutit 2023-mi qaavatigut 1,5 mia. kr.-inik suli pitsaanerulernissaat pillugu 2018-2023-mut illersornissaq pillugu isumaqatigiissummut
ilassutitut isumaqatigiissut Danmarkimi naalakkersuisut 2019-mi akuersissutigaat.
Isumaqatigiissut atsioqqaartinnagu Savalimmiut aamma Kalaallit Nunaat akuerseqataaqqaartussaavoq, tamannalu Nunanut allanut, Inuussutissarsiornermut Niuernermullu Naalakkersuisup Vivian Motzfeldt illersornissamullu ministerimit Morten Bødskovimit atsiorneqarpoq.
Corona pissutaalluni isumaqatigiissutip suliarineqarnera sivisusimasoq Vivian Motzfeldtip oqaatigaa.
- Nunatsinni suliffeqarfiit kattuffiillu isumaqatigiissut iluaqutigissagaat piumasaqarpugut isumaqatiginninniarnermi ukioq kingulleq oktobarimi akuutinneqaleratta. Isumaqatiginninniarneq piffissamik atuiffiusimasoq maanna isumaqatigiissutaavoq, Vivian Motzfeldt Sermitsiaq.AG-mut oqarpoq.
Danskit piumasaat
Ilinniarfiulertussaq danskit naalakkersuisuinit aamma Nunatsinni naalakkersuisunit oqallisaangaatsiarsimavoq.
- Ilinniarfik sakkutuutut ilinniarfiussanersoq upalungaarsimanermulluunniit ilinniarfiussanersoq oqallisaanikuuvoq. Piumasaqaatigut malillugit upalungaarsimanermut ilinniarfinngussaaq, oqarpoq.
Kalaallit Nunaata piumasaqaatai malillugit isumaqatigiittoqarsimanngitsoq Nunanut allanut tunngatillugu naalakkersuisuusimasup Pele Brobergip oqaatigaa.
- Danskit Issittumi piumasaat malillugu isumaqatigiissusiorneruvoq, isumaqatigiissut pillugu oqarpoq.
Ataatsimiititaliami siulittaasup nersualaarpaa
Nunanut Allanut Sillimaniarnermullu Ataatsimiititaliami siulittaasup Pipaluk Lynge Rasmussen (IA) isornartorsiuineq isumaqatiginngilaa.
- Isumaqatigiissut, isumaqatiginninniarnermilu suliarineqarnera, nuannaarutigaara. Partiit tamarmik peqataatinneqarnissaat Naalakkersuisunit sulissutigineqarnikuuvoq. Isumaqatigiissut Kalaallit Nunaata pitsaanerpaamik angusaqarnissaa kiisalu sunneeqataanissaq anguniagaanikuuvoq.
Air Greenland qanimut suleqatigineqarnissaa Pipaluk Lynge Rasmussenip nuannaarutigaa. Qanorli Air Greenland toqqaannartumik suleqataanissaa itinerusumik oqaatigineqanngilaq.
Air Greenland isumaqatigiissusiorsinnaasoq
Air Greenland Assartuinermi suliassatigut tapertaanissamut pisariaqartitsineq
qulaajarneqassaaq. Sulineq naatsorsuutigineqarpoq 2022-mi ukiup affaata siulliup
ingerlanerani aallartinneqassasoq isumaqatigiissummi takuneqarsinnaavoq.
Isumaqatigiissusiortoqassappat Air Greenland amerlanerusunik suliassaqalersinnaavoq.
- Suliaq pitsaanerujuaannarsinnaavoq, ilikkagaqarfigaarpulli, taamaattumik Kalaallit Nunaata sunniuteqarfiginerpaasaa siunnertaralugu sulineq ingerlaqqissaaq.