Vivian Motzfeldt Pittuffimmut isumaqatigiissut nutaaq pillugu: Ingerlatseqatseqatigiiffiup piumasaqaatinik malinninnera pingaaruteqarpoq.
Ingerlatseqatigiiffiupå Inuksuk A/S-ip Pituffimmi kiffartuussinissamik isumaqatigiissuteqarfigineqarnera nuannerpoq, nunanut allanut tunngasutigut naalakkersuisoq oqarpoq. Oqaatigaa, Permagreen Grønlandi Inuksuup 51 procentianik piginnittuusoq maluginiarsimallugu.
Pituffimmi kiffartuussinissamik isumaqatigiissutissaq nutaaq ukiorpaalunni isumaqatiginninniutigineqareerluni inissinneqarpoq. 2014-imi Exelix Services Amerikamiut suliffeqarfiutannit Vectrusimit 100 procentimik pigineqartoq isumaqatigiissuteqarfigineqarmat Kalaallit Nunaannit isornartorsiorneqangaatsiarpoq.
Apeqqutaalersorli tassaavoq, Naalakkersuisut ingerlatseqatigiiffimmut Inuksummut Permagreen Grønlandimit, taamalu Vectrusimit pigineqartumut isumaqatigiissuteqartoqarnera naammagisimaarneraat. Matumuunali Vectrus ingerlatseqatigiiffiup 49 procentiinnaannik piginneqataasuuvoq.
Nunanut allanu naalakkersuisup Vivian Motzfeldtip (S) oqaatigaa, Naalakkersuisut angusaq naammagisimaaraat:
- Suliaq sivisuumik suliarineqarsimavoq, maannalu kiisami aalajangiisoqarlui. Aalajangiineq tungitsinnit nuannaarutigaarput, Inuksussuup 51 procentianik nunatsinni ingerlatseqatigiiffik - Permagreen Grønlandimit pigineqarmat, Vivian Motzfeldt Sermitsiaq.AG-mut oqarpoq, nangillunilu:
USA-mik suleqateqarneq suli annerulersinnaasoq
- Angusap aamma takutippaa USA-p, Danmarkip Kalaallillu Nunaata akunnerminni qanimut ataqqeqatigiillunilu suleqatigiinnerat angusaqartitsisinnaasoq, tamatsinnut naammagisimaarnartumik. Tamanna nuannaarutigaarput. Maanna USA-p Kalaallillu Nunaata ukiuni kingullerni marlunni suleqatigiinnerat suli annerulersinnaavoq.
Nunanut allanut naalakkersuisup erseqqissaassutigaa, USA-p, Kalaallit Nunaata Danmarkillu 2020-mi isumaqatigiissutaanni piumasaqaatit Permagreenimit Vectrusimillu malinneqarnissaat pingaarutreqartoq:
- Tassa suliffeqarfik Pituffimmi suliassanik isumaginnittoq Kalaallit Nunaanni tamakkiisumik akileraartartussaavoq.
- Imaassinnaavoq aningaasat pineqartut nunanut allanut annikitsuaraasut, uatsinnullu annertuujupput, Vivian Motzfeldt oqarpoq, nangilluniluD:
Motzfeldt: Piumasaqaatinut malinnittoq
- Aamma pingaaruteqarpoq, suliffeqarfiup Inuksuup maani Nunatsinni allaffeqarnera. Taamaammat isumaqarpunga, piumasaqaatit malinneqarsimasut. Tamatumattaaq takutippaa suleqatigiilluartugut.
Vivian Motzfeldtip aamma oqaatigaa, suliffeqarfiup ilinniarnermut atatillugu praktikkertoqartarnissaa, ilinniartuuteqartarnissaa inersimasunillu ilinniartoqartarnissaa:
- Soorunami aamma kissaatigaarput, kalaallinik sulisoqarnissamik ukkataqartoqarnissaa. Isumaqatigiissummik piffissami sivisuumi atuuttussaavoq. Taamaalilni Nunarput suliffeqaffillu isumaqatigiissummit pissarsiaqassapput, Vivian Motzfeldt oqarpoq.
Kiffartuussinissamik isumaqatigiissut nutaaq ukiuni aqqaneq-marlunni atuutissaaq, 27,8 milliarder koruunillu angullugit naleqarluni. Suliassat isumagineqartussat tassaapput sakkutooqarfimmi - Pituffimmi - ingerlatsillunilu aserfallatsaaliisarnissaq.