Kinaassuserput sanngiillisarnagu nukittorsagassaraarput. Siumumi siulittaasunngorniarluni sassarniartoq Vivian Motzfeldt taamak isumaqarpoq.

- Taamaammat isumaqarpunga, ICC-mut aningaasaliissutaasartut ukiuni aggersuni appartinneqarnissaannik pilersaaruteqarneq allanngortinneqartariaqartoq. Tulluartuusorinngilara ukiorpassuarni suleqatigiinnerup pitsaasorpassuarnik inerititaqarfiusup aningaasanik ikilisaanerup malitsigisaanik unittoortinniarneqassappat, tusagassiorfinnut nalunaaruteqarluni allappoq.

ICC qineqqusaarutaasoq

ICC taamaalilluni Siumumi siulittaasunngorniarluni qineqqusaarnermut ilanngunneqarpoq.

2020-mut aningaasanut inatsimmi erseqqissumik allassimavoq, ICC-mut aningaasaliissutaasartut aappagu affaannanngortinneqassasut.

- Aningaasaliissutinik appaaneq pivoq, aningaasanut inatsimmi aningaasartuutit isertitallu oqimaaqatigiissinneqarnissaat anguniarlugu sipaaruteqarniarnerup malitsigisaanik, tunngavilersuutigineqartoq taamatut nipeqarpoq.

ICC-mit aalajangiisimaneq ernumanartinneqarsimavoq, tassa 2022-mi inuit kattuffiat Ilulissani ataatsimeersualerpat, Kalaallit Nunaata siulittaasuuffigiligassaani, inuit kattuffiat akissaqassanersoq qularutigineqalersimammat.

- Kinaassuserput sanngiillisarnagu nukittorsagassaraarput​​​​​​.​ Nukittulluta nunarsuarmioqataassagutta nammineq pitsinnik naleqartitatsinnillu aallussinerput annertusarneqartuartariaqarpoq. Inuiattut ima ikitsigaagut suulluunniit pigisavut kinaassutitsinnut inuiaassutitsinnullu iluaqutaasut tamarmik nukittorsarneqartuartariaqarlutik. Parteerisamut aalajaappallaanerup nukilaallisissanngilaatigut katataatillutalu, Vivian Motzfeldt oqarpoq.

2022-mi ICC-mi siulittaasunngornissaq

ICC-p aningaasaqarnera aatsaat oqallisaalinngilaq. 2014-imi Inatsisartuni amerlanerussuteqartut kaammattuutigaat, kattuffiup allanit isertitaqarsinnaaneq eqqarsaatigisariaqaraa.

Vivian Motzfeldtip eqqaasitsissutigaa, inuit kattuffiata ICC-mi siulittaasuuffik 2022-mi tigusussaagaat. Taamaammallu kattuffiup aningaasaliissutit ikilisinneqarnerannit eqqugaanissaa inissaminiinngitsoq.

- Eqqortuusinnaanngilaq naammaginaranilu kattuffiup ukiorpassuarni ineriartortitseqataasimasup aningaasaliissutinik ikilisaaniarnerup malitsigisaanik annaasaqarnissaa, taanna oqarpoq.