Vittus: USA-p aallartitaqarnissaa pingaaruteqartupilussuuvoq

Amerikamiut Nuummi aallartitaqalernissaat Aningaasaqarnermut Naalakkersuisoq nuannaarutigaa

- Amerikamiut Kalaallit Nunaanni aallartitaqarnerisigut toqqaannartumik USA oqaloqatiginissaanut periarfissaqalissaagut, Vittus Qujaukitsoq Future Greenlandimi erseqqissaavoq.

Amerikamiut aallartitaqarfik ukiuni arlalinni matoqqatissimavaat, amerikamiulli Nuummi aallartitaqarfimmik aammaaqqinnissartik sapaatip akunnerata siuliani oqaatigaat.

Vittus Qujaukitsup erseqqissarpaa, nutaamik aallartitaqalerpat pingaaruteqartoq Kalaallit Nunaat USA-mik toqqaannartumik attaveqarsinnaalernissaa.

Vittus utoqqatsertoq

Sapaatip akunnerata siuliani Issittumi Siunnersuisoqatigiit Finlandimi ataatsimeeqatigiinnerini naggataarutaasumik nalunaaruteqartoqannginnera Vittus Qujaukitsup ajusaarnartippaa.

- Issittumi Siunnersuisoqatigiinni naggataarutaasumik nalunaaruteqartarnernut sanillersuunnerani nalunaaruteqarsimannginneq allannguerusuttoqarneranik takussutissaavoq, Aningaasaqarnermut Naalakkersuisoq erseqqissaavoq.

USA silap pissusia pillugu isummaminik allannguerusussimanngilaq killormuanilli Rusland aamma Kina amerikamiut isiginnittariaasiannit Issittumi sillimaniarnermut politikkimik aarlerinarsiortortitsingaluttuinnarnerarlugit oqariartuuteqarpoq.

NATO-mi peqataavugut

- Soorunami Kina pillugu sillimaniarnermut politikkip ernumassutigineqarnera malinnaavigaarput, erseqqissarusupparali Nunatsinni tulluusimaarutigalugu NATO-mi peqataanerput, Vittus Qujaukitsoq oqarpoq.

- Aningaasat qalipaateqanngillat. Tunngaviilli assigiinngillat. Nunarsuaq tamakkerlugu niueqateqartarpugut taamaammat ernumassutigineqartut eqqumaffigaagut, Vittus Qujaukitsoq oqarpoq.

Powered by Labrador CMS