Vittus: Sullifeqarfiit uku ikiorserneqarsinnaapput
Vittus Qujaukitsup erseqqissaatigaa, suliffeqarfiit sorliit ikiorsiissutinik iluaquteqarsinnaanersut
- Ikiorsiissutissat suliffeqarfiit coronap ajornartorsiutaaneranit eqqorneqarsimasut akiliisinnaassusaannik nukittorsaassapput, Aningaasaqarnermut Naalakkersuisoq Vittus Qujaukitsoq oqarpoq.
Uku ikiorserneqarsinnaapput:
Niuertunik pilersuisut niuertullu
Unnuisarfiit Neriniartarfiillu
Kulturilerisut, aliikkusersuisartut timersortartullu
Suliffeqarfiit allattorsimaffii www.aka.gl aqqutigalugu tamanut saqqummiunneqassapput.
- Erseqqissaatigissavarput, Akileraartarnermut Aqutsisoqarfiup aalajangissammagu, inuussutissarsiutinut taakkununnga pingasunut sorliit ilaatinneqassanersut, Vittus Qujaukitsoq oqarpoq.
Aamma periarfissaavoq, akileraarutit-A-t sulinermullu akileraarutit akilerneqarnissaat qaammatinik pingasunik kinguartinneqarsinnaanera.
Suliffeqarfiit ataasiakkaat sulinal.nanoq.gl aqqutigalugu, akiliuteqarnissamut piffissarititap kinguartinneqarnerannut ilaanerlutik paasisaqarfigisinnaavaat.
Nunatta Karsia sunnerneqassasoq
- Soorunami tamanna Nunatta Karsianut sunniuteqassaaq. Naatsorsuutigaarput ajornartorsiut minnerpaamik qaammatinik pingasunik sivisussuseqassasoq, Vittus Qujaukitsoq oqarpoq.
Apeqqutissaqaraanni allanilluunniit apeqqutissaqaraanni tax@nanoq.gl saaffigineqartassaaq.
- Soorunami naatsorsuutiginngisatut ajornartorsiulernissamut aningaasassaqartariaqarpugut, aamma akiliisinnaassuseqarnissamut 700 millioner koruuninik aningaasaateqarnissa piumasaqaataavoq. Maannakkulli1,6 milliarder koruuninik akiliisinnaassuseqarpugut. Aningaasat taakku ilarpassui Sanaartornermut Aningaasaateqarfimmi sanaartugassanut attuumassuteqarput. Coronamik ajornartorsiuteqarneq qaammatit pingasut sinnerlugit sivisussuseqassappat, tamanna akiliisinnaassutsitsinnut qanoq kinguneqarsinnaanersoq maanna naatsorsorneqarpoq, Vittus Qujaukitsoq oqarpoq.
Taarsigassarsinissaq pisariaqalersinnaasoq
Vittus Qujaukitsup oqaatigaa, suliffissaaleqisut amerliartulissanersut eqqumaffigilluarneqarniartoq.
Nunatta Karsia assigalugu, kommunit akiliisinnaassutsiminni upalungaarsimanissamik pisariaqartitsisut. Kommunillu ajornartorsiulissappata, Nunatta Karsiani taarsigassarsisinnaneq aamma eqqarsaatigineqarsinnaasoq.
- Maannakkorpiaq qanoq inississanerluta oqaatigisinnaanngilarput. Ajornartorsiornerulli qanoq sivisutiginera apeqqutaalluni, taarsersugassatsinnik taarsigassarsisariaqalersinnaavugut. Nunatta Karsia 2020-mi amigartooruteqarnissaa ilimanarpoq. Ajornartorsiornerullu qanoq sivisutiginera apeqqutaalluni. 2021-mi aamma amigartooruteqarluni ingerlatsisoqartariaqarsinnaavoq, Vittus Qujaukitsoq oqarpoq.
Politikkeraqatiminut kaammattuutigaa, inatsisitigut suliniuteqarnissamut tunuarsimaaqqullugit, aningaasanik naleqartarmat, akerlianik aaqqissuusseqqinninnernut inuiaqatigiit aningaasaataannik sipaaruteqartitsisussanut peqataaqquai.
Aatsitassarsiortut
Aatsitassarsiortut Coronami sakkortuumik eqqugaaqqapput, Naalakkersuisut sulineq suliffiillu ingerlaannarnissaat siunertaralugu, ukiup sinnerani suliniutissat uku pingasut eqqarsaatigaat:
Aatsitassarsiorfiit ujaasinermi pisussaaffiisa sakkukillineqarnissaat
Oqartussanit sullinneqarnermut akiliuteqarnissaannik piumasaqatannginnissaq
Piiaanissamut akuersissuteqarnermi isumannaallisaanissamut piumasaqaatit sakkukillineqarnissaat
Sanaartugassanik kinguartitsineq
Vittus Qujaukitsup uppernarsarpaa, sanaartugassat inuiaqatigiinnut pingaaruteqarpallaanngitsut kinguartinneqarniartut.
- Siullertulli coronamik ajornartorsiuteqarnitta anigornissaa ukkataraarput, taanna oqarpoq.