Vittus: Qanoq isumaqarluni taamatut oqarpa?
Aningaasaqarnermut Naalakkersuisup Vittu Qujaukitsup Amerikami naalakkersuisut sinniisaannik arlalinik inummillu CIA-mut attuumassutilimmik ataatsimeeqateqarsimanerminik ilisititsissuteqarnissaq ajornartorsiutiginnglaa.
- Aasap ingerlanerani Amerikami naalakkersuisut sinniisaannik arlalinnik naapeqateqartarsimavunga. Inuit Amerikami nunanut allanut ministeeriaqarfimmeersut, niuernermut ministeeriaqarfimmeersut, nukissiuuteqarnermut ministeeriaqarfimmeersut Amerikamiullu ambassadeqarfianeersut naapeqatigisarsimavakka, Vittus Qujaukitsoq, Dansk Folkepartiimi ilaasortap Søren Espersenip naalakkersuisup ataatsimeeqateqartarsimaneranut tunngatillugu nunanut allanut ministerimut Jeppe Kofodimut apeqquteqarsimaneranut akissuteqarluni ilisimatitsivoq.
Søren Espersen nunanut allanut tunngasutigut ataatsimiititaliami ilaasortaavoq, nunanullu allanut ministerimut Jeppe Kofodimut oktobarip aappaani apeqqutini imaattoq nassiuppaa ”Ministerip uppernarsarsinnaavaa, Kalaallit Nunaanni Anngaasaqarnermut Nunanilu Avannarlerni Suleqatigiinnermut Naalakkersuisoq Vittus Qujaukitsoq, Alaskameeqqammersoq, USA-mi naalakkersuisut sinniisaannik kiisalu CIA-meersumik isertortumik ataatsimeeqateqarsimanersoq, ataatsimeeqatigiinnermilu ilaatigut Namminersorlutik Oqartussat USA-llu illugiillutik isumaqatigiissuteqarnissamik oqaluuserisaqarsimanersut kiisalu Pituffimmik atuinermut akiliuteqartitsinissamik oqaluuserisaqarsimanersut?”
CIA-mik ataatsimeqateqarsimaneq pillugu
CIA-mik ataatsimeeqateqarsimanermut tunngatillugu Vittus Qujaukitsoq imatut oqarpoq:
- Qanittukkut Alaskami oqallittoqarmat, CIA-mi pisotaanerusimasoq, general Davis Petraeus, KKR Global Institute-mi siulittaasuusoq issiaqatigaara. International Forum of Sovereign Wealth Fundsip (IFSWF) Juneau-mi Alaskamiittumi aqqanilissaanik ukiumoortumik ataatsimiinnerani tamanna pivoq.
Naalakkersuisut septembarip 18-iani ilisimatitsissutigivaat, IFSWF-imi siunertaasoq, naalakkersuinikkut pitsaasumik ingerlatsisoqarnissaanik aningaasaliissuteqartarnerullu pitsanngorsaaffigineqarnissaanik anguniagaqarnissaq. Kattuffimmi ukiut tamaasa ataatsimeeqatigiittoqartarpoq, tassani nunat tamalaat 30-t sinnerlugit amerlassusillit siuttui nunanilu allarpassuarni politikkerit misillitakkanik attaveqaatinillu avitseqatigiinniarlutik naapeqatigiittarput.
Tupinnartoqanngilaq
-Amerikamiunik ataatsimeeqateqarsimaneq tupinnartortaqanngilaq. Tamanna tupinnanngilaq, aamma Amerikamiut qinnuiginninnerat tunngavigalugu ataatsimiittoqarpoq, Aningasaqarnermut Naalakkersuisoq erseqqissaavoq, innersuussutigalugulu Naalakkersuisuni ilaasortat nunat allat naalakkersuisuisa sinniisaannik ataatsimeeqateqartarnerat nalinginaasuusoq.
Paasisinnaanngilaa, sooq Søren Espersenip pisimasut taakku annertusarlugit nunanut allanut ministerimut apeqqutigisimanerai.
- Qanoq iliorsimanikka qanorlu iliorsimannginnikka pillugit taamatut saqqummiineq nuanninngilaq. Tamanna ingasattajaarneruvoq, Vittus Qujaukitsoq erseqqissaavoq.
Pakatsisippaatit?
- Naamik. Kisianni qanoq isumaqarluni taamatut oqarpa? Eqqarsartaaseruna qanoq ittoq Søren Espersenip takutikkaa, Vittus Qujaukitsoq nipini nipittorlugu aperivoq, nangillunilu oqaatigalugu:
Nunasiaatillit ileqquat ajornerpaaq
- Tamanna nunasiaatillit ileqquattut ajornerpaatut isigaara. Søren Espersenip kiniseerinik oqaloqateqarsimagaangatta ajorisarpaa. Taassumalu isumaa malillugu Amerikamiunik oqaloqateqarsimanerput aamma ajorpoq. Søren Espersenip apeqquteqarnermigut suna siunertarineraa naluara, taamaakkaluartoq sunaana isuma. Soorunami kikkunnik oqaloqateqartarnissatsinnut aqunneqassanngilagut, Vittus Qujaukitsoq erseqqissaavoq.