Vittus: Pissanganartunik suliassaqarpunga
Nunatta Qitornaanni siulittaasup Vittus Qujaukitsup aatsitassanut, suliffeqarnermut nunami namminermilu naalakkersuitut toqqarneqarnini naammagisimaarpaa
- Soqutiginartunik akisussaaffeqalerlunga oqaatigisaeriaqarpara, taamaattumi naalakkersuisutut sulinissannut qilanaarpunga.
Tallimanngornermi aatsitassanut, suliffeqarnermu nunami namminermullu naalakkersuisutut ilisaritinneqartoq, Vittus Qujaukitsoq, Nunatta Qitornai, taama oqarpoq.
- Maanna pingajussaanik Naalakkersuisunut ilaanera soorunami nuannaarutigaara. Ingammik suliffeqarnermut naalakkersuisunngoqqinnera nuannaarutigaara, tassani suliffissaaleqinerup akiorneqarnissaa pingaarnersaavoq. Tassanilu aamma avataanit suliartortartut ilaapput, suliniutillu ilusilersornissaannut qilanaarpunga, Vittus Qujaukitsoq erseqqissaavoq.
- Aatsitassanut naalakkersuisuusimasup suliai illillu suliavit suut allaanerussutigissavaat?
- Suliassat suliarineqarsimasut nangissavakka. Tamatuma allaanerussutaa tusagassiortut namminneq nalilersorumaarpaat, Vittus Qujaukitsoq oqarpoq.
- Narsap eqqaani Kuannersuarnut pilersaaruteqarpit?
- Tamanna oqaaseqarfiginianngilara. Suliat ataasiakkaat maanna takoqqaarusuppakka, tamanna kingusinnerusukkut oqaaseqarfigiumaarpara, Vittus Qujaukitsoq oqarpoq.
- Uranisiorneq pillugu partii qanoq isumaqarpa?
- Oqaatigeriikkattut tamanna oqaaseqarfiginianngilara, tamanna pillugu oqaaseqannginninni suliassat ataasiakkaat takussavagut, Vittus Qujaukitsoq oqarpoq.