Skip to main content

Vittus: IA isumaqatigiissutinik qimarratiginnippoq

VIttus Qujaukitsoq nunatsinni partiit annersaata tullianut, Inuit Ataqatigiinnut sakkortuumik isornartorsiuivoq, politikikkut oqallinnermut "siunnerfeqarluartumik angusaqarfiusumillu suleqataarusukkunnaarnera" pillugu.

Aningaasaqarnermut naalakkersuisup Vittus Qujaukitsup aviisimi Sermitsiami isumaliutersuummi, partii IA 2019-imut aningaasanut inatsimmi isumaqatigiissutinik qimarratiginnittutut oqaatigaa.

Vittus Qujaukitsoq allagaqarluni sammisat marluk taakkartorpai, tassani IA isummanik allannguisimanerarpaa.

Neriorsuummik unioqqutitsineq siulleq

- Utoqqalinermi soraarnerussutisiallit saniatigut isertissinnaasaasa qaffanneqarnissaat pillugu Naalakkersuisut inatsisissatut siunnersuutaa ungasinngitsukkut IA-p itigartimmagu IA-p neriorsuisimanerminik allanngortitsinera siulleq takuarput. Naalakkersuisut siunnersuutaatigut nunatsinni utoqqalinersiallit ukiorpassuanngortuni kissaatigisimasaattut, utoqqalinersiaminnit ilanngaanneqaratik ukiumut 100.000 kr.-t tikillugit aningaasarsiornerulersinnaanerannik periarfissinneqarniarput, Vittus Qujaukitsoq isumaliutersuummini allappoq, itisiliillunilu:

- Partiip neriorsuutigisimasaminit tunutsinerminut tunngavilersuutai qujageqqusaarnertut taanneqarsinnaapput; utoqqalinermi soraarnerussutisiat tamanut qaffanniarneqarput. Illuatungiliuttuutilluni taamatut neriorsuineq ajornanngitsuararsuuvoq, taamaaliornerminnilumi aamma siunnersuutertik qanoq aningaasalersussanerlugu oqaatsimik ataatsimilluunniit eqqaanngilaat.

Neriorsuutinik unioqqutitsinerit aappaat

Naalakkersuisup neriorsuutinik unioqqutitsinertut oqaatigisaata aappaa tassaavoq, akiligassanik akiliisitsiniarnermut akiliisitsissutip Ilanngaassiviup inatsisissatut suliarineqarnerani.

- 2019-imut aningaasanut inatsit pillugu isumaqatigiissummi, partiit isumaqatigiissummut ilaasut, tassani IA ilaalluni, Ilanngaassiviup aallartisarnissaa pillugu imminnut assammipput. Suliniutissaq aningaasanut inatsit pillugu isumaqatigiissummi ersarilluinnartumik nassuiarneqarpoq, taamaammallu partiip suna atsiorsimanerlugu ilisimasimanagu oqarsinnaanngilaq, Vittus Qujaukitsoq naqissusiivoq.

IA suliami peqataasoq

Taassuma Ilanngaassivik pillugu suliarineqarnera pillugu ima saqqummiuppaa:

  • Suliniutit Akileraartarnermut Atugarissaarnermullu ataatsimiititaliarsuup isumaliutissiissutaani 2011-imeersumi saqqummiunneqarpoq.

  • Kingornalu taamanikkut Naalakkersuisup Maliina Abelsenip (IA-meersup!) 2012-imi Naalakkersuisut 2025-mut pilersaarutaannut ilannguppaa.
  • Taamatuttaaq taamanikkut Naalakkersuisut Attassiinnarnissamut Inerikkiartortitsinissamullu pilersaarutaanni 2016-imeersumi ilaavoq, soorluttaaq akiitsut akiitsunillu akilersuineq pillugu nassuiaammi suliniutissatut ilaalluni, taakkulu taamanikkut Aningaasaqarnermut Akileraartarnermullu Naalakkersuisup Aqqaluaq B. Egedep (IA-meersup!) 2017-imi saqqummiuppai.
  • Taavalu aamma 2018-imi aningaasanut inatsit pillugu isumaqatigiissummi november 2018-imeersumi, IA-llu atsioqataaffigisaani.

Vittus Qujaukitsup IA aammalu partiit illuatungiliuttut akisussaassuseqartumik ingerlanissaannut kaammattuivoq.

Isumaliutersuut tamakkiisoq Sermitsiami atuaruk – uani ataani linki aqqutigalugu aviisimut isissutissarsigit:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER