Vittus: EU-mit millioninik annaasaqarpugut

EU-mik peqateqarluni ilinniartitaanermi isumaqatigiissummi Nunarput millioninik marlunnik kisitsisitalinnik annaasaqarpoq.

Ilinniartitaanermi EU-mik peqateqarnissamik isumaqatigiissutip iluani, Nunarput 15 millionit koruunit missaanni annaasaqassasoq, aningaasaqarnermut naalakkersuisup Vittus Qujaukitsup 2019-imi aningaasanut inatsisissamut siunnersuutip siullermeerneqarnerani saqqummiuppaa.

Pissutaasoq

- Appartitsinissaq pissuteqarpoq aningaasanut missingersuusiami pioreersumi suliniutissanut EU 2021-2027-mi isumaqatigiissutissamut nutaamut atugassanik immikkoortitsisereersimammat, Vittus Qujaukitsoq Inatsisartut oqaluttarfiannit ilisimatitsivoq.

- Suliniutissat taakku Naalakkersuisut EU-llu akornanni isumaqatigiissutigineqassapput, aningaasallu atugassiissutigineqartussat isumaqatigiissut naapertorlugu suli atorneqassapput Nunattali Karsiani isertitatut nalunaarsorneqassanatik, taanna oqarpoq.

Kingusissukkut nalunaarutigineqartoq

Taamatut allannguineq kingusissorujussuakkut EU-mit nalunaarutigineqarpoq, allannguutissallu sunniutissaa qanoq ittorpiaassanersoq pillugu Naalakkersuisut maanna EU-mik oqaloqateqartut, Aningaasaqarnermut naalakkersuisoq ilisimatitsivoq.

- Aningaasat inaarutaasumik annertussusilerneqarnissaanni aningaasat tunniunneqarnissaat pillugu EU-mik qanoq isumaqatigiissuteqartoqassanersoq apeqqutaassaaq. Tamanna aappassaaneerinissaq pingajussaaneerinissarlu pitinnagit paasineqassaaq, Vittus Qujaukitsoq oqarpoq.

Ukiuni sisamani tulliuttuni sinneqartoorneq

Saqqummiussinermini aningaasanut ukiuni sisamani tulliuttuni sinneqartooruteqartussaq saqqummiuppaa.

- 2019-2022-imi aningaasanut inatsisissap tamarmiusup takutippaa 2019-imi aningaasanut inatsisissatut siunnersuut naapertorlugu ingerlatsinermi sanaartornermilu sinneqartoortoqassasoq 17,7 mio. kr.-nik, tassa aningaasartuutit isertitallu eqqarsaatigalugit tassani Naalakkersuisut angorusutaat anguneqartoq. Tamatumali peqatigisaanik malunnarpoq aningaasaqarnikkut periarfissat eqqarsaatigissagaanni ingerlatsinermut aningaasartuutit qaffatsinnissaat taasariaqartumik amerlissanngitsut, taanna naqissusiivoq.

Annertusisamik naammassiortuineq

Siunissami ineriartorneq namminersortutigut pissasoq aamma oqaatigineqarpoq.

- Kiffartuussisarnerup iluani pitsanngorsaanissamut kissaatigineqartut pisortaniillu aningaasaliisarnerit tamanna pissutigalugu pisortat ingerlatsiviini annertusisamik naammassiortuinermik tunuliaquteqartariaqarput. Tamakku Naalakkersuisut ukiuni aggersuni nakkutigineqarnissaat kissaatigaat assigiinngitsutigut suliniuteqarnikkut, ilaatigut pisortat peqatigiillutik naleqquttunut iliuuseqarnerisigut, Vittus Qujaukitsoq oqarpoq, taassuma 2019-imut aningaasanut inatsit sapinngisaq tamaat siammasissumik isumaqatigiissutigineqarnissaa siunnersuutigaa.

Powered by Labrador CMS