Vittus: Eqqumiitsuliortut akileraartinneqartassapput
Pele Brobergip aalajangiiffigisassatut siunnersuutaa, kalaallit eqqumiitsuliortut akileraartinneqartannginnerisigut kalaallinut inuiaqatigiinnut qanoq akeqassanersoq pillugu qulaajaasoqarnissaanik imalik Naalakkersuisut itigartippaat
Aningaasaqarnermut Naalakkersuisup Vittu Qujaukitsup akissutaani imatut allassimasoqarpoq:
- Naalakkersuisut isumaqarput inuussutissarsiutigalugu eqqumiitsuliortut assersuutigalugu fabrikimi, aalisartutut nakorsatulluunniit sulinermikkut isertitalinnit annikinnerusumik akileraartinneqassanngitsut. Tamatta aningaasarsiatigut aallaavittut isigalugu assigiimmik akileraarusersorneqartariaqarpugut, inuuniarnitsinnut qanoq aningaasarsiarineqarsimanersut apeqqutaatinnagu.
Aningaasatigut tapiiffigineqartareersut
Vittus Qujauktisup erseqqissaatigaa, aningaasanut inatsimmi eqqumiitsuliornermut kulturimullu tapiissutitut 12 millioner koruunit immikkoortinneqartartut, eqqumiitsuliornermut eqqumiitsuliortunullu aningaasatigut tapiissutit aningaasanut inatsit kommunillu missingersuutaat aqqutigalugit suli isumagineqartariaqartut, nunatta karsiata kommunillu aningaasaataasa ataatsimut pingaarnersiornerisa ilaattut, akileraarusersueriaatsitsinni immikkut aaqqissuussinerit aqqutiginagit
- Siunnersuuteqartup oqaatigaa akileraartitsinnginneq eqqumiitsuliortuunissap kajuminnarnerulernissaanut kinguneqarsinnaasoq, eqqumiitsuliortunut kajumilersitsisinnaasoq, kulturimut siuarsaataasinnaasoq naggataatigullu inuiaqatigiinnut iluaqutaasumik inuussutissarsiutitigut kaaviaartitsinermut annertusaaqataasinnaasoq. Imaassinnaanerpami pisiniarfimmik piginnittoq, aalisartoq suliffissuarmilu sulisoq namminerpiaq inuussutissarsiutimik akileraarutitigut oqilisaaffiginissaanut assinginik tunngavilersuuteqalissasut, Vittus Qujaukitsoq akissuteqaammini aperivoq.
Siullermeerinninneq
Naalakkersuisut taamaammat aalajangiiffigisassatut siunnersuut oktobarip 18-iani siullermeerlugu oqaluuserineqartussaq itigartitsissutigineqassasoq inassuteqaatiggaat.