Skip to main content

Vittus: Coronap kinguneri imatut akilerneqassapput

Nunatta Karsiata aningaasaqarnera coronap ajornartorsiortitsineranit ajalusooqqunagu, pisortat sanaartortinniagaat arlallit unitsikkallarneqassapput.

Nunatta Karsia coronap ajornartorsiortitsineranit ajalusuunnginnissaa anguniarlugu Naalakkersuisut siunnersuutaat, Aningaasaqarnermut Akileraartarnermullu Ataatsimiititaliamit ulluni makkunani suliarineqarpoq.

Naalakkersuisut Sanaartugassanut Iluarsagassanullu Aningaasaateqarfimmut aningaasaliissutit katillugit 541,3 millioner koruunit utertinneqarnissaat ataatsimiititaliamut inassutigisimavaat.

Tassa Naalakkersuisut, Nunatta Karsiata aningaasaateqaqqilernissaata tungaanut suliassat arlallit taamaatiinnarneqarsinnaasut kinguartinneqarsinnaasulluunniit toqqarsimavaat. Taamaaliornikkut coronap akiorneqarnissaanut aningaasassaqartoqalissaaq, inassuteqaammi allassimavoq.

Erngup nukinganik innaallagissiorfiliornissat kinguartinneqartut

Aningaasaqarnermut Naalakkersuisup Vittus Qujaukitsup siusinnerusukkut nalunaarutiginikuuaa, erngup nukinganik innaallagissiorfiliornissanit aningaasanik aallertoqassagunartoq, Naalakkersuisullumi inassuteqaataani aamma taakku ilaapput.

Siunnersuutigineqarpoq erngup nukinganik innaallagissiorfiup Qorlortorsuup allilerneqarnissaanut aningaasaliissuti 144 millioner koruuninik ilanngarneqassasut. Innaallagissiorfik Kujataaniippoq, Qaqortumut Narsamullu innaallaggissimamik pilersuisoq.

Erngup nukinganik innaallagissiorfiliornissat Nukissiorfinnut attuumassuteqarput, Naalakkersuisullu siunnersuutigaat, ingerlatseqatigiiffimmut aningaasaliissutinit annertuumik ilanngaasoqassasoq.

Naalakkersuisut siunnersuutigaat, Nukissorfiit sanaartugassaataanit katillugit 311,2 millioner koruunit peerneqassasut.

Timmisartoqarfiliortoqarnerani naammassineqarnissaat ilimananngitsoq

Aningaasaqarnermut Naalakkersuisoqarfimmit erseqqissaatigineqarpoq, aingaasanik allanut nuussinermi Qorlortorsuup allilerneqarnissaanik suliniut, Aasiannik Qasigiannguanillu pilersuisussamik innaallagissiorfiliorniarneq, kiisalu Nuummi innaallagissiorfiup allilerneqarnissaa taamaatiinnarneqanngitsut:

- Aningaasaqarnikkut maanna inissisimanermi, avaqqunneqarsinnaanngitsumik pisariaqartinneqarpoq, Namminersorlutik Oqartussat aningaasaqarnikkut inissisimanerata piffissami qaninnermi nukittorsarneqarnissaanut aningaasanik atuinissaq, ukiunilu qaninnerni timmisartoqarfissat nutaat suliarineqarneranni, sanaartugassat annertuut aallartinneqarnissaat piviusorsiunngitsututu siunertamulluunniit naapertuutinngitsutut nalilerneqarput, Vittus Qujaukitsoq saqqummiussissumini oqarpoq.

Sanasut illersorneqartut

Coronap ajornartorsiutaanerani sanaartornerup annikillisinnaanera pinngitsoortinniarlugu, Naalakkersuisut sanaartornerit allartinneqareersimasut unitsinniarnagit aalajangersimaput. Suliassat suliarinnittussarsiuunneqalereersimasut aamma unitsinneaqassanngillat.

- Siunertaavoq nunami maani suliffissaqartitsinerup maanantut atuutsiinnarneqarnissaata qulakkeerneqarnissaa, saqqummiussami allassimavoq.

Inatsisartut Aningaasaqarnermut Akileraartarnermullu Ataatsimiititaliaat Naalakkersuisut inassuteqaataat tamanut saqqummiussimavaa. Ataatsimiititaliaq ilisimatitsivoq, inassuteqaat marlunngornermi maajip 19-iani suliarineqartussaagaluartoq.

Inassuteqaat tamaat uani atuaruk.

Listen over de omrokeringer, som naalakkersuisoq Vittus Qujaukitsoq indstiller.
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER