Vittus: Corona pissutaalluni erngup nukinganik nukissiorfiliornissat kinguartinneqartut
Corona Nunatta Karsianut akisuupilussuummat, Naalakkersuisut erngup nukinganik nukissiorfiliornissamut aningaasaliissutissatut pilersaarutit kinguartippaat.
Kalaallit Nunaani ikiorsiissutissat qaammatini tulliuttuni pingasuni Nunatta Karsianut minnerpaamik 257 milliorner koruuninik akeqassapput, tamatumalu kinguneranik erngup nukinganik nukissiorfiliornissat kinguartinneqarput, Aningaasaqarnermut Naalakkersuisoq Vittus Qujaukitsoq Sermitsiaq.AG-mut ilisimatitsivoq.
257 millioner koruunit Kalaallit Nunaanni suliffeqarfinnut, pingaartumik takornariartitsisartunut, akunnittarfinnut, neriniartarfinnut, pisiniarfinnut niuertunullu pilersuisunut kiisalu kulturikkut suliaqartut Naalakkersuisut atorniagaat, coronamik ajornartorsiuteqarneq sivitsussappat aamma qaammatit pingasut sinnerlugit sivisunerussappat suli amerlanerulersinnaapput.
Aningaasaqarnermut Naalakkersuisup Vittus Qujaukitsup nassuiaatigaa, Nunatta Karsia 1,6 milliarder koruuninik uninngasuuteqartoq, aningaasat taakkua amerlanersaat Sanaartornermut Iluarsaassinermullu Aningaasaateqarfimmi suliniurissanur pituttugaapput.
Ukiakkut ataatsimiinnermi akuerineqartussaagaluartut
Corona pissutigalugu suliniutit sorliit kinguartinneqarniarnersut aperisoqarmat, Vittus Qujaukitsup erngup nukinganik nukissiorfiliassat eqqaavai, erngup nukinganik nukissiorfiliassaq ataaseq amerlanerilluunniit pineqarnersut oqaatiginagit.
Naalakkersuisut milliarderpassuit nalingannut marlunnik erngup nukinganik nukissiorfiliornissamik pilersaaruteqarput: Nuummi Kangerluarsunnguami erngup nukinganik nukissiorfiup allilerneqarnissaa aamma erngup nukinganik nutaamik nukissiorfiliornissaq, Qasigiannguanik Aasiannillu pilersuisussaq.
Siorna ukiakkut ataatsimiinnermi Inatsisartut aalajangerpaat, Naalakkersuisut kingusinnerpaamik 2020-mi ukiakkut ataatsimiinnermi aalajangiiffigisassatut siunnersuummik saqqummiussissatut, erngup nukinganik nukissiorfiliassat ataatsimut ingerlanneqarnissaannik, piginnittussaanni aningaasaliiffigineqarnissaannillu imaqartussamik.
Suliniutit arlallit kinguartinneqarsinnaasut
Sisamanngormat tusagassiortunik katersortitsinermi Vittus Qujaukitsup ilismatitsissutigaa, siullertut coronamik ajornartorsiuteqarnerup pitsaanerpaamik qanoq anigorniarneqarnissaa ukkatarineqartoq. Naalakkersuisut tulliullugu misissorniarpaat, Nunatta Karsia pisariaqartinneqartunik aningaasaateqaqqilernissaata tungaanut, suliniutit sorliit kinguartinneqassanersut.
Ilisimatitsissutigaa, Nunatta Karsia minnerpaamik 700 millioner koruuninik uninngasuuteqartussaasoq. 1,6 milliarder koruuninillu uninngasuuteqarnermi, inuiaqatigiit 900 millioner koruuninik aningaasaateqartut, ikiorsiissutinut aningaasaliissutissanullu atorneqarsinnaasunik, tassa taarsigassarsisariaqalersinnani.