Vittus: Benzinamut akiliutit oqaluttuaannanngorput
Naalakkersuisuusimasup Doris J. Jensenip benzinamut akiliutaata atornerlunneqarnerata kingorna, Namminersorlutik Oqartussat akeqanngitsumik biileqartitsisarneranut atatillugu benzinamut akiliummik korteqartarneq Aningaasaqarnermut Naalakkersuisup Vittus Qujaukitsup unitsippaa.
Nunatta Karsiata 2017-imi naatsorsuutaanut tunngatillugu Kukkunersiuinermut Ataatsimiititaliap isumaliutissiissutaanut akissuteqaammini, Namminersorlutik Oqartussat ataanni naatsorsuuserinermut allagaqaatini ilitsersuummik nutaamik peqalersimasoq, Aningaasaqarnermut Naalakkersuisoq Vittus Qujaukitsoq allappoq.
Ilitsersuut
- Ilitsersuut nutaaq naapertorlugu immikkoortuni atorfimmut atatillugu biilinut atugassanik benzinamut akiliutissanik korteqartarunnaarput. Tamatumalu kingorna taamaallaat suliffimmut atatillugu biilerisat, biilinut aalajangersimasut orsersorneqareernerisa kingorna akiligassamik, biilip nalunaarsorneqarnerata normuanik ilanngussilluni nassitsinikkut tamanna pisinnaalissaaq.
Vittus Qujaukitsoq ilanngullugu ilisimatitsivoq:
- Suliffimmut atatillugu biilit isumaqatigiissuteqarfiusut saniatigut biilinik allanik orsertoqarsinnaanngilaq. Nalinginnaasumik ammasarfiit avataanni orsernikkut, inuk biilinik atuisoq nammineerluni akileeqqaartariaqassaaq, kingornalu aningaasartuutigisap nalinginnaasumik nalilersoreernerani aningaasartuutit utertillugit.
Sipaarnerunissaq eqqaaneqanngilaq
Kukkunersiuinermut Ataatsimiititaliap Naalakkersuisuni ilaasortat akornanni sulinermut atatillugu akeqanngitsumik biileqartitaasuni “sipaarnerunissamut” tunngatillugu malittarisassaliortoqarnissaanik qinnuteqaataa, Vittus Qujaukitsoq akissuteqaammini ataasiarluniluunniit eqqaanngilaa.
Qassit benzinamut akiliummik korteqartitaanersut ilisimatitsissutigineqanngilaq. Assersuutigalugu Naalakkersuisut Siulittaasuat Kim Kielsen benzinamut akiliutaasartumik korteqanngilaq.
Aamma atuaruk: Kukkunersiuinermut ataatsimiititaliaq: Kielsenip benzinamik atuinera ukkanneqarpoq
Benzinamut akiliummik korti pillugu allaaserisat uani atuarsinnaavatit: Sermitsiaq.AG-p allaaserisai