Vittus: Atuinikinnerusimaneq sipaarniarnermut pissutaasoq
Aningaasaqarnermut Naalakkersuisup Vittus Qujaukitsup sipaarniarluni ingerlatsinissat marluk, Sermitsiaq.AG-p ataasinngormat saqqummiussai, ”Covid-19-p tunillaassuunnerani atuinikinneruffissatut naatsorsuutigineqartunik aallaaveqartut”
Sipaarniarfissatut pilersaarutit marluk, naalakkersuisoqarfiit assigiinngitsut kontuinit ukioq manna 12 aamma 73 millioner koruuninik ilanngaaffigineqartussat "eqqarsaatigilluagaanngitsutut" imalunniit ”isumaginninnikkut eqquinerluttutut” oqaatigineqarsinnaanngitsut, Vittus Qujaukitsoq isumaqarpoq, taannalu aalajangersimavoq Sermitsiaq.AG-p ilanngutassiai marluk Naalakkersuisut nittartagaasiut oqaaseqarfiginiarlugit.
Taanna isumaqarpoq, Sermitsiaq.AG sukiumiisumik saqqummiussisimanngitsoq, oqaatigalugulu corona pissutaalluni angalasinnaasoqartanngimmat Namminersorlutik Oqartussani nalinginnaasumit annikinnerusumik atorfimmut atatillugu angalasoqartarsimasoq.
Aktiviteter ikke gennemført
- Tamatumalu saniatigut pisortat ingerlatsiviisa annertuut matoqqatikkallarneqarnerisa suliassat ingerlanneqartussatut pilersaarutigineqartut, pilersaarutigineqartutut ingerlanneqarsinnaannginnerat nassataraa. Taamaalillunilu sullissinerup ajornerulersinneqarnissaa siunertaanngilaq, Vittus Qujaukitsoq erseqqissaavoq, innersuussutigalugulu karsimik misissuinermi Isumaginninnermut, Ilaqutariinnermut Inatsisinillu Atuutsitsinermut Naalakkersuisoqarfik, Naalakkersuisut Siulittaasuata Naalakkersuisoqarfia, Aningaasaqarnermut Naalakkersuisoqarfik, Nunanut allanut Naalakkersuisoqarfik, Aatsitassanut Naalakkersuisoqarfik, Ineqarnermut Attaveqaatinullu Naalakkesuissoqarfik aamma Avatangiisinut Pinngortitamullu Naalakkersuisoqarfik eqqugaasimasut.
Allattorsimaffik tamakkiisuunngitsoq
Vittus Qujaukitsup ilanngussamini Peqqissutsimut Naalakkersuisoqarfik oqaaseqarfiginngilaa, Aningaasaqarnermulli Ataatsimiititaliap imaqarniliaani allassimavoq, naalakkersuisoqarfik pineqartoq aamma sipaarniarfigineqassasoq, tamannalumi imaqarniliamit tigulaakkami tulliuttumi takuneqarsinnaavoq:
Aamma assersuutigalugu innarluutilinnut sullissivik Pissassarfik 2,5 mio. koruuninik ilanngaaffigineqartussaavoq. Naalakkersuisuttaaq Aningaasaqarnermut Ataatsimiititaliamut qinnuteqaataanni takuneqarsinnaavoq, isumaginninnermut peqqissutsimullu oqartussaqarfiit 73 millioner koruunit sipaarutigineqartussat 20 procentiinik tunniussaqartussaasut.
"Akisussaassulimmik aningaasaqarnermik aqutsineq"
- Aningaasaqarnermut pissutsit maannakkutut inneranni Naalakkersuisut qinnuteqaataat akisussaassusilimmik piffissaagallartillugulu aningaasaqarnikkut aqutsinerannik ersersitsivoq, taamaalilluni aningaasat siunertarineqartunut atussallugit angumerineqarsinnaanngitsut, siunertanut allanut piviusunngortinnissaat suli angumerineqarsinnaasunut atugassanngortinneqarsinnaaqqullugit, Vittus Qujaukitsoq erseqqissaavoq, nangillunilu oqaatigalugu "tamannalu tupinnartuliaanngilaq”.