Vittus: Aningaasanut inatsisip isornartorsiorneqarnera naleqqutinngilaq
Aalisarnermit isartitassat aningaasanut inatsimmi annertunaarlugit missingersuusiorneqarnikuunngillat, kialluunniimmi coronap ajornartorsiortaalernissaa ilimagereersinnaanngilaa, Aningaasaqarnermut Naalakkersuisoq Vittus Qujaukitsoq oqarpoq.
Aningaasaqarnermut Siunnersuisoqatigiit ukioq mana aningaasanut inatsimmi isertitassa annertunaarlugit missingersuusiorneqarsimanerannik mianersoqqutaannik Naalakkersuisut tusaanngitsuusaarsimanerarneqarnerat naleqqutinngilaq. Taamatut allappoq Aningaasaqarnermut Naalakkersuisoq Vittus Qujaukitsoq.
Aviisimi matumani ilanngutassiaq, "Aningaasanut Inatsiq: Politikkerit mianersoqqussummik tusaanngitsuusaartut", Vittus Qujaukitsup nalunaaruteqarnermini qisuariarfiaa.
Ilanngutassiami pineqarpoq, Aningaasaqarnermut Siunnersuisoqatigiit 2019-imut nalunaarusiaminni allassimammassuk, siunnersuisoqatigiit isumaat malillugu aalisarnermit isertitassat missingersuusiorneranni, mianersortumik tunngaveqarnissaq malinneqarsimanngitsoq:
- 2020-mut Aningaasanut Inatsisissatut siunnersuut taamatut mianersortumik tunngaveqarnissamut malinninngilaq. Isumalluutit akitsuutaannit 399 mio. koruuninik isertitaqarnissaq missingersuusiorneqarsimavoq, tassa 2018-imi 425 mio. koruuninik iluanaaruteqarujussuarsimanermit annikinnerulaartunik missingersuusiortoqarsimavoq. Peqatigitillugu missingerneqarsimavoq, Ingerlatsinermut Sanaartornermullu missingersuutini 6 mio. koruuninik sinnertartootoqalaarnissaq, Aningaasaqarnermut Siunnersuisoqatigiit nalunaarusiaminni allapput.
Inuussutissarsiutinik pingaarutilinnik amerlanerusunik pisariaqartitsineq
Siunnersuisoqatigiit pisaat tassaavoq, Nunatta Karsiata aalisakkat akiisa qaffasinnerannik pinngitsuuisinnaajunnaannginnissaa, Kalaallit Nunaata aningaasaqara aalisakkanut akigititat nikerarnrannit pissuteqartumik immikkut mianernartuummat.
Tamannali kukkusumik inerniliinrusoq, Vittus Qujaukitsumit oqaatigineqarpoq:
- Aningaasaqarnermut Siunnersuisoqatigiit pingaarnermik oqariartuutaa tassaavoq, Aningaasanut Inatsisissatut Siunnersuutip aalisarnermut akitsuutikkut isertitai annertuallaartut, kisiannili aappaatigut nunatta aningaasarsiornera assigiinngiiaassasoq, aalisarneriinnaq suliffigalugu aningaasarsiussannginnatta. Naalakkersuisut siunnersuisoqatigiit isumaqatigai, Vittus Qujaukitsoq allappoq.
Akigititat apparujussuarsimasut
Aalisakkeriviit avammut nioqquteqartartut, Sermitsiaq.AG-mit oqaoqaligineqarsimasut naapertorlugit, coronap ajornartorsiortitsinerata malitsigisaanik kinguppannut akigititat 20 aamma 30 procentit akornanni appariarsimapput.
Tassunga atatillugu Vittus Qujaukitsoq allappoq:
- Nunarsuarmi aalisakkerinerup coronamik ajornartorsiutip nerisassiornermut immikkoortortaqarfimmi (restaurantit, kantinat il.il.) akinik appariartitserujussuartoq ersersippaa. Atugassanik pisiniarfinnilu (pisiniarfinni aalisakkanik tuniniaaneq) akinik appariartarneq akulikinngikkuni annikittarsimavoq.
- Akit taamatut sunnertissimanerat, aalisakkerinermut aningaasalerisunit imaluunniit aalisarnermi tatigineqartunit naatsorsuutigineqanngilaq. Peqqut taaneqartoq malillugu aamma akinik appariarneq naatsorsuutigisimassagipput naleqqutinngilaq, Vittus Qujaukitsoq allappoq.