Vittus: Akitsuutinik qaffaanerit ajoriinnagassaanngillat
Aningaasaqarnermut Naalakkersuisoq Vittus Qujaukitsoq akitsuutinik qaffaanermut akerliusorpassassuarnut akerliliilluni oqaaseqarpoq. Akitsuutinik qaffaanerit ajoriinnagassaanngillat, Vittus erseqqissaavoq
Vittus Qujaukitsup 2020-mut Aningaasanut inatsisissap ualeru Inatsisartuni pingajussaanik suliarineqarnissaa sioqqullugu pisariaqarsorisimavaa nassuiaatigissallugu, sooq Naalakkersuisut partiillu tapersersuisup Demokraatit akitsuutinik arlalinnik innuttaasunit akerlerineqaqisunik qaffaapallattariaqarsimanerat.
- Naalakkersuinikkut akisussaassuseqarneq nunatsinnut nunattalu siunissaanut pisariaqartinneqarpoq. Pingaarnersiuinissami piumassuseqarnissaq sapiissuseqarnissarlu pisariaqarput, tamannalu soorunami amerlasuunit iluarineqaannarneq ajorpoq, Vittus Qujaukitsoq aningaasanut inatsisissatut isumaqatigiissutip imarisai pillugit tamat oqallinnerannut atatillugu nassueruteqarpoq.
Sapiissuseqartoqartariaqartoq
- Akileraarutit appartinneqarnissaannut aningaasartuutillu qaffanneqarnissaannut tapersersorneqarnissaq ajornanngilaq, aammalu aningaasalersuutaasariaqartut tapersersorneqarnissaat ajornarnerulluni – sapiissuseqarnerunissarlu pisariaqarluni. Taamaattumik suliami matumani naalakkersuisooqatigiit Demokraatillu akisussaassusermik tigusinissamut piumassuseqarnerat iluarisimaarpara, Nuummi akerliussutsimik takutitsisut 2000-ingajalluinnaat kamaqqaqisut saallugit oqaaseqareernerminit nalunaaquttap akunnialunnguisa qaangiunneranni tusagassiorfinnut nalunaarutqarluni erseqqissaavoq.
Vittus Qujaukitsoq aningaasanut inatsisissami iluaqutissanik ajoqutissanillu taaguivoq, ilisimatitsissutigalugulu ilanngaatissat ilanngaatigereerlugit ukiut sisamat ingerlaneranni akileraarutitigut akitsuutitigullu 127 millioner koruuninik oqilisaasoqartoq.
- Akileraarutit akitsuutillu ilaat appartinneqarput – aammalu sulinermut ilanngaat atuutsinneqalerluni. Biilinut aalajangersimasunut, tupamut, imigassanut aalakoornartortalinnut sukkunullu akitsuutit qaffanneqarput. Ataatsimut isigalugu 2020-mi aningaasanut inatsimmi akileraarutinut akitsuutinullu ukiut sisamat ingerlaneranni 336 millioner koruuninik oqilisaanissamut missingersuusiortoqarpoq. Tamatumunnga ilaapput ingerlatseqatigiiffinnut akileraarutip appartinneqarnera, sulinermut ilanngaatip atuutsinneqalernera, aammalu ATV-nut qamutinullu nunakkoorutinut mikinerusunut motoorinut akitsuutip appartinneqarnera, kiisalu snescooterinik ATV-nillu eqqussuinermut akitsuutip atorunnaarsinneqarnera. Tamatuma peqatigisaanik biilinut innaallagiassamik hybridimillu ingerlateqartunut akitsuutip nassatarisaanik, kiisalu eqqussuinermut akitsuutit naleqqussarneqarnerannit 209 millioner koruuninik isertitaqarnissaq missingersuusiorneqarpoq. Tamanna isumaqarpoq ilanngaatissat ilanngaatigereerlugit ukiut sisamat ingerlaneranni akileraarutitigut akitsuutitigullu 127 millioner koruuninik oqilisaasoqarmat, Vittus Qujaukitsoq tusagassiorfinnut nalunaaruteqarnermini allaapoq.
Aningaasaliissuteqarnerusoqartassasoq
Taassuma oqaatigaa, suliffeqarfiit nunami aningaasaliissuteqarnerunissamut periarfissaqalissasut, ingerlatseqatigiiffiit akileraarutaat appartinneqarmat.
- Akitsuutinik qaffaanerit soorunami akueriuminaatsinneqartarput; pisumili matumani akueriuminarluinnarlutik , Vittus Qujaukitsoq erseqqissaavoq, ilaatigullu innersuussutigalugu akitsuusersuinerit innuttaasunik peqqinnerulersitsissasut, tassa naatsorsuutigineqarmat akitsuutit qaffanneqarnerisigut mamakujunnik, cigarettinik imigassamillu atuisukinnerulissasoq.