maajip aallaqqaataa
Vittus: Unammilligassaqarpugut
Inuussutissarsiornermut, Sulisartoqarnermut, Niuernermut Nunanullu Allanut Tunngasunut Naalakkersuisoq Vittus Qujaukitsoq nunani tamalaani sulisartut ulluanni aamma oqalugiarpoq
Ullumi nunani tamalaani sulisartut ullorsiorput. Tamatumunnga atatillugu inuussutissarsiornermut, sulisartoqarnermut, niuernermut nunanullu allanut tunngasunut naalakkersuisoq Vittus Qujaukitsoq (S) oqalugiarpoq.
Taanna oqarpoq Kalaallit Nunaat unammilligassarpassuaqartoq.
– Sulisartoqarneq ukiuni makkunani allanngoriartorpoq. Atorfitoqqat peerupput, nutaanik takkuttoqarpoq - ilaatigut takornariaqarnermi aatsitassarsiornermilu, aammattaarli utoqqarnik isumassuinermi kiffartuussinermillu ingerlatani allani, taanna oqalugiarnermini oqarpoq.
Siumut isiginiassaagut
– Siumut isigisiniarsinnaassaagut, tamannalu peqatigalugu piffinnit siusinnerusunit pitsaanerpaat pingaarnerpaallu nassataralugit: Ataqatigiinneq, qanilaassuseq kulturerpullu nalissaqanngitsoq, tamatumani aalisarneq piniarnerlu nunamut tamarmut aalajangiisuusumik tunngaviullutik. Allannguisinnaassaagut, tamannalu peqatigalugu pitsaanerpaat attatiinnarlutigit, Vittus Qujaukitsoq erseqqissaavoq.
Suliffissaqanngitsutikilipput
Nuannaarutigaa Kalaallit Nunaanni suliffissaqanngitsut maanna ikilisimammata.
– Suliffissaqanngitsut suli amerlavallaaqaat - amerlavallaarujussuaqaat - ukiulli aappaata affaata ingerlanerani 1100-t sinnerlugit ikileriarsimapput. Tamanna nuannaarutigisinnaalluarparput, inuussutissarsiornermut naalakkersuisoq oqarpoq.
– Siunissaq qulakkeerniarlugu Naalakkersuisut suliniuteqarnertik nangippaat. Ukiaru ingerlatsiviit pisortallu oqartussaasut lærlinginik praktikkertunillu atorfinitsitsinissamut akisussaaffeqarnerat pillugu inatsisissatut siunnersuumik saqqummiussissaagut.
– Suliassarli pisortanit oqartussaasunillu kisimi kivinneqarsinnaanngilaq. Allannguinerit taamaallaat piviusunngorsinnaapput kikkut tamarmik isumassarsianik siunnersuutinillu pitsaasunik peqataappata. Tamatigut iliortarnitsitut - ataqatigiilluni, ataqatigiinneq pissutigalugu, Vittus Qujaukitsoq oqarpoq.