Vittus sussanerluni eqqarsarniarpoq

Partiit minnerit marluk, Inatsisartunut 2018-imi qinersineq sioqqullugu pilersinneqarsimasut, qinersinermi matumani Inatsisartunut isertitaqanngitsoorput.

Nunatta Qitornai katillugit 639-inik taaneqarpoq, taasinerilli Inatsisartunut ilaasortaatitaqalernissamut naammanngillat.

Siulittaasoq Vittus Qujaukitsoq 269-init taaneqarpoq, taamatullu Inatsisartunut 2018-imi qinersinermit 400-nit ikinnerunngitsunit taaneqarnikinnerulluni.

- Partiit aalajangernernut, ilaatigut qinersisartunit nuannarineqarpallaanngitsunik pisariaqartunilli, aalajangeeqataasarsimavoq. Tamannalu ippassaq qinersinermi akilerparput, aamma tamanna tusaatissatut tiguara, Vittus Qujaukitsoq oqarpoq. Taanna ukiuni arlalinngorluni Aningaasaqarnermut Naalakkersuisuusimavoq.

Partii Inatsisartunut aamma Avannaata Kommuniani kiisalu Kommuneqarfik Sermersuumi kommunalbestyrelsenut isertitaqanngitsoorpoq.

Partiip sorlai annertusarneqassapput

Taanna nassuiaavoq partii naalakkersuisoqataagami akisussaaffimmik annertuumik tigummiarsimasoq, taamatullu illoqarfinni immikkoortortaqarfissat siuarsarneqarnissaanut nukissaqartoqarsimanngikkallartoq. Maannali illoqarfinni immikkoortortaqarfiit siuarsarneqartussanngorput.

- Partii piusinnaanngilaq immikkoortortaqarfeqanngikkuni. Qinersinermi takuarput kommuninut aamma Inatsisartunut ataatsikkut qinersisitsineq uagutsinnut oqimaappallaarsimasoq. Qinersiviit angisuut marluk kivinniarneri uagutsinnut akisuvoq, Qujaukitsoq oqarpoq.

Qinersinerulli kingorna qasuersaaqqaassaaq, sussanerlunilu eqqarsaatigeqqaassallugu.

Suleqatigiissitsisut qinernikinnerpaapput

Suleqatigiissitsisut Inatsisartunut qinersinermi taasisiminnit aamma tununneqarput. Partii katillugit 375-inik taaneqarpoq, taamaattumillu Inatsisartunut ilaasortaatitaqalerani.

Siulittaasoq, Tillie Martinussen 180-init taaneqarpoq, tassa 2018-imit taasisut 300-nik ikileriarlutik.

Partii Inatsisartunut qinersinermik ukkatarinnissalluni aalajangersimavoq, taamaattumillu kommuninut sassartitaqarani. Sermitsiaq.AG-p partiip siulittaasua Tillie Martinussen oqaaseqartinniarsimagaluapaa iluatsinnaguli.