Vittus Qujaukitsup Air Greenlandimi aktiaanik pisineq illersorpaa
Danskit naalagaaffiata aamma SAS-ip Air Greenlandimi aktianik Namminersorlutik Oqartussat pisiniarlutik aalajangernerat Partii Naleqqap isornartorsiorpaa. Kisianni Namminersorlutik Oqartussat aktianik pisinerata timmisartortitseqatigiiffik iluaqutsiinnassavaa, Vittus Qujaukitsoq oqarpoq.
- Air Greenlandimi suliniutit arlallit itigartillugit, SAS-ip itigartitsisinnaanini arlaleriarluni atortarnikuuaa, tamannalu suliffeqarfimmut akorngutaasimavoq.
Naalakkersuisut danskit naalagaaffiannut aamma SAS-imut pisinermut isumaqatigiissusiornerisa kingorna, Namminersorlutik Oqartussat kisermaassillutik Air Greenlandimik piginnittunngorneranni, aningaasaqarnermut naalakkersuisoq Vittus Qujaukitsoq (NQ) taama oqarpoq.
Danskit naalagaaffiata aamma SAS-ip aktiaataannik pisineq Partii Naleqqap isornartorsiorpaa, inuiaqatigiinnut atuisunullu akisussasoq, partii isumaqarami.
- Partii Naleqqamit isornartorsiuineq paasisinnaanngilara. Air Greenlandip ukiorpassuani nioqqutini ineriartortinniaraluarpai, kisianni suliniutit assigiinngitsut SAS-ip itigartitsisinnaanini atorlugu itigartittarpai. Air Greenland maanna nammineerluni sulisinnaanngorpoq, piginneqataasullu allat apeqqutaatinnagit ineriartortitsinissamut periarfissani annertusillugit. Isumaqatigiissut naammagisimaartorujussuuara, ilaasut tamarmik aamma inuiaqatigiit iluaqutsissammagit, Vittus Qujaukitsoq oqarpoq.
Danskit naalagaaffiata Air Greenlandimi aktiaatai 25 procentit aamma SAS-ip aktiaatai 37,5 procentit Naalakkersuisut pingasunngornermi pisiaraat.