Vittus Qujaukitsoq: Naalakkersuisunit tunuarpunga

- Naalakkersuisuunera tassunga killeqarpoq. Ullumi naalakkersuisutut tunualerpunga.

Inuussutissarsiornermut, suliffeqarnermut, niuernermut, nukissiornermut nunanut allanullu naalakkersuisoq Vittus Qujaukitsoq (S), ataasinngornermi ullaakkut Facebookimini taama allappoq.

Vittus Qujaukitsup Naalakkersuisunit tunuarluni aalajangerluni Sermitsiaq.AG-mut uppernarsarpaa.

- Aap, Naalakkersuisunit tunuarnera ilumoorpoq, kisianni allamik oqaasissaqanngilanga, Vittus Qujaukitsoq naatsumik Sermitsiaq.AG-mut taama oqarpoq.

Inatsisartunut qinersisoqarnerani kingullermi Vittus Qujaukitsoq qinigaanissamut naammattunik taaguunneqanngitsoorpoq, tassani 87-init taaguunneqarpoq. 2013-imi qinersisoqarnerani 215-nit taaguunneqarpoq.

Vittus Qujaukitsoq 2016-ip naalernerani danskit aviisiannit Politikenimit apersorneqarnerminut atatillugu oqallisaangaatsiarpoq.

Vittus Qujaukitsoq tassani Kim Kielsenip kingusinnerusukkut akerlilersugaanik oqariartuuteqarpoq, tassani Vittus Qujaukitsup Naalakkersuisut tusarniaqqaarsimannginnamigit.

Inuussutissarsiornermut, suliffeqarnermut, niuernermut, nukissiornermut nunanut allanullu naalakkersuisuunerup saniatigut Aleqa Hammondip siulittaasuunerata nalaani aamma aningaasaqarnermut naalakkersuisuunikuuvoq.