Skip to main content

Vittus Qujaukitsoq eqqissisaavoq

Tunngaviusumik missingersuutit amigartooruteqartarnerat ippinnartortaqanngilaq, ukiulli tullianut aningaasanut inatsisissamut isumaqatiginninniarnissani pingaarnersiuinissaq inissaqartariaqarpoq, Aningaasaqarnermut Naalakkersuisoq, Vittus Qujaukitsoq taama oqarpoq.,

Aningaasaqarnermut Naalakkersuisoq, Vittus Qujaukitsoq, NQ, eqqarsarluaqqusivoq. Aningaasaqarnerup qaarluinnalerneranik ulorianartortutut isigineqartoq, piviusuunngilaq. Qinigaaffimmi matumani aningaasaqarnikkut ulorianartorsiunngilagut. Aningaasaqarnermut naalakkersuisoq, Vittus Qujaukitsoq, tusagassiortunik katersortitsinermini taama oqarpoq.

- Tunngaviusumik missingersuut qissimikkaanni amigartooruteqartarnera ippinnartuunngilaq. Akit akissarsiallu qaffariarnerannut iluarsiissutit, aammalu pingaarnersiuinerit ilanngunneqarneq ajormata taamaattarpoq, oqarpoq.

Tunngaviusumik missingersuummi 18,3 milliuunit koruuninik sinneqartoornissaq Naalakkersuisut naatsorsuutigisimagaluarpaat. Kisitsisilli kingulliit takutippaat 461,5 milliuunit koruuninik amigartooruteqartutut isikkoqartoq. Nikigassut 479,5 milliuunit koruuniuvoq.

LÆS OGSÅ: Aningaasanut inatsimmi naatsorsuutiginngisamik amigartoornerujussuaq

SIK-mi ilaasortat akissarsiaannik pitsanngorsaaneq aammalu peqqinnissaqarfiup iluani ukiuni sisamani tullerni aningaasaliinerulernissaq ilaatigut tamassumunnga pissutaasoq, Aningaasaqarnermut Naalakkersuisoq nassuiaavoq.

Nalornineq inissaminiinngilaq

Naalakkersuisup nassuerutigaa akileraarutitigut ilanngaatissat pillugit Inatsisartuni ataatsimiinnissaq sioqqullugu aningaasaqarnermut akileraartarnermullu ataatsimiititaliap isumaliutissiissutaa pissutigalugu nunatta aningaasaqarnera pillugu inuiaqatigiit akornanni nalornisoqalersimasoq.

Ataatsimiititaliap isumaliutissiissutimini erseqqissarpaa ataatsimiititaliaq Naalakkersuisumit allakkiamik ersertuussassamik tunineqarsimasoq. Allakkiami Naalakkersuisunit erseqqissarneqarpoq “naalagaaffimmit ataatsimoortumik tapiissutit akit akissarsiallu malillugit iluarsiissuteqarfigineqareeraluartulluunniit aningaasanut inatsisissatut siunnersuutissami ukiunilu missingersuusiorfiusuni 100 millionilikkaanik amigartooruteqarujussuarnissaq naatsorsuutigineqartoq”.

- Inuiaqatigiinni nalornilerneq tunngavissaqanngilaq. Aningaasaqarnerup oqimaaqatigiinnissaa Naalakkersuisut sulissutigaat, oqarpoq.

Aningaasanut inatsi oqimaaqatigiissoq naatsorsuutigaa

- Aningaasanut inatsi 2020-moortoq amigartooruteqanngitsoq saqqummiutissavara, Vittus Qujaukitsoq oqarpoq.

LÆS OGSÅ: IA: Kalaallit Nunaata aningaasaqarnerani tupannartoq

Tusagassiortunik katersortitsinermini oqarpoq aningaasanut inatsisip oqimaaqatigiissuunissaanut Naalakkersuisut isumassarsiaqalereersut.

- Aalisakkat qaleruallillu akii maannakkut taama qaffasitsigitillugit tunngaviusumik missingersuusiornermi qanoq ilillusi amigartooruteqarsinnaagassi?

 

- Akit appariaateqarnissaat aappaagumut aningaasanut inatsisissami naatsorsuutiginngilarput. Soorunami qaffasittuaannarnissaat taanna mianersuuttariaqarpoq, taamaallutik piumaneqarnerat aamma appariartortoq naluneqanngimmat, taavalu akit nikerartartut. Kisianni aappaagumut tunngatillugu nikeriangaarnissaat annertuumik naatsorsuutiginngilarput.

 

- Tunngaviusumik missingersuutit maannakkutut isikkoqartillugit ilumut inissaminiippa nunatta Air Greenlandimut piginneqatigiissutinik pisinera?

 

- Air Greenlandimut pisineq, Air Greenlandip nammineq aningaasaataanit akilerneqarpoq. Aamma akissaqarpoq piginneqatigiiffik patajaatsumik aningaasatigut inissisimanini peqqutigalugulu. Taamaattumik nunatta karsianut aningaasaqarneranut kalluinngilaq Air Greenlandip piginneqataassutaanik naalagaaffimmut SAS-imullu pisineq.

 

- Naalakkersuisut nammineerlusi tikkuaasinnaalereerpisi aningaasat suminngaanniit aaneqassanersut?

- Eqqarsaateqarpugut, kisianni soorunami partiit tassani tunuliaqutaasut, taavalu isumaqatigiinniarnerni uani oqaloqatigisassagut piffissanngorpat taamanikkussamut tikikkumaarpagut, kisianni takorluugaqarpugut soorunami.

 

- Suut takorloorpisigit?

- Tassa isaatitsivissat, suliffissaaleqinerup apparsarnissaa. Ilinniartitaanikkut angusatta suli qaffasinnerulernissaat. Ilinniakkatigut unittoortarnerup annikillisarneqassasoq, sulinngitsoortarnerup annikillisarneqarnissaa ilaalu ilanngullugit, inuiaqatigiittut ullumikkut kingaallassimaartitsissutaasut sapinngisamik apparsarneqarnissaat qissimingaatsiassavarput.  

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER