Vittus Qujaukitsoq Atassummut pakatsisimasoq

Aningaasaqarnermut Naalakkersuisoq Vittus Qujaukitsoq, Atassutip Tungaviusumik Inatsisissaq pillugu Isumalioqatigiissitamit anilluni nalunaaruteqarnerata kingorna, partiimut allagaqarami allassimavoq, aajangerneq kukkunerusoq isumaqarluni.

Atassut sapaatip akunnerani kingullermi Tunngaviusumik inatsisissaq pillugu Isumalioqatigiissitamit aniniarluni aalajangersimavoq, Naalagaaffeqatigiinnit aninissamut tapersersuinnginnini aamma aningaasat allanut pitsaanerusumik atorneqarsinnaaneri tunngavilersuutigalugit. Aningaasaqarnermut Naalakkersuisoqarfimmi, Tunngaviusumik inatsisissaq pillugu Isumalioqatigiissitamut attuumassuteqartumi pakatsisoqarsimavoq.

- Tunngaviusumik inatsisissaq kinguaariiaappassuit inuunerannut sunniuteqartussaavoq, taamaammat ajuusaarnarpoq, Atassutip tunngaviusumik inatsisissamik suliaqarnermi piffissamut ungasissumut periarfissaqarnermik paasinnissimannginnera, Vittus Qujaukitsoq Atassummut allakkamini allappoq.

Ilanngullugu allappaa, partiip aninissaa sioqqullugu ammasumik oqaloqatiginnissimalluni, aamma partii isummaminik allanngortitsissagaluaruni, Tunngaviusumik inatsisissaq pillugu Isumalioqatigiissitami suli inissaqartoq.

Isumalioqatigiissitami partiip ilaasortaatitaata Paninnguaq Krusep, sapaatip akunnerani kingullermi nalunaaruteqarneq naammaginngilluinnarpaa, erseqqissaatigalugulu isumalioqatigiissitamit nammineerluni tunuarniarnani.

- Partiip aalajangernera paasisinnaanngilara, taamatullu aalajangerneq pakatsinarpoq. Sulinermi pinnguartarfiunngilaq, tassami isumaqarpunga tunuassaguma aningaasat asuli atorneqarsimassasut, partiip nalunaarutaa tusaramiuk taamatut qisuariarpoq.

Inissaq partiimit pigineqartoq

Vittus Qujaukitsulli erseqqissaatigaa, isumalioqatigiissitami inissaq partiimit pigineqartoq, taamalu Paninnguaq Kruse tassani ilaasortaajunnaartoq.

Qujaukitsup innersuussutigaa, Tunngaviusumik inatsisissaq pillugu Isumalioqatigiissitamut suliakkiissummi, ilaasortassanik toqqaaniarnermi imatut allassimasoqartoq:

Tunngaviusumik Inatsisissaq pillugu Isumalioqatigiissitaq kingullermik Inatsisartunit qinersinerup kingorna partiinit ilaasortaatitaqalersunit innersuussinerit najoqqutaralugit Naalakkersuisunit toqqarneqartunik arfineq-marlunnik ilaasortaqarpoq.

- Siuliani pineqartut tunngavigalugit Atassutip nalunaarutaa tusaatissatut tiguara, Tunngaviusumilli inatsisissaq pillugu Isumalioqatigiissitami partiip inissaa ammatippara. Tassunga ilassutitut nalunaarutigissavara, Paninnguaq Kruse Atassut sinnerlugu Tunngaviusumik inatsisissaq pillugu Isumalioqatigiissitami ilaasortaajunnaarmat, juunillu aqqaneq-aappaani anilluni, Vittus Qujaukitsoq Sermitsiaq.AG-mut oqarpoq.

Powered by Labrador CMS