Vittus pisortat ingerlataqarfiisa annertusiartornerannut illersuisoq
Pisortat ingerlataqarfiisa annertusiartornerannut ilaatigut isumaginninnermi suliassaqarfimmut aningaasaliissuteqarsimaneq pissutaavoq, piffissaq ungasinnerusoq eqqarsaatigalugu isumaginninnermi ajornartorsiutit ikinnerulernissaannik taamalu aningaasartuutikinnerulernissamik kinguneqartussamik, Aningaasaqarnermut Naalakkersuisoq oqarpoq.
Pisortat ingerlataqarfii annertusiartorput, tamanna Naalakkersuisut Napatitsinermut Siuariartornissamullu Pilersaarutaannut naapertuutinngilaq.
Pisortat ingerlataqarfiisa annertusiartornerisigut siunissami aningaasaqarnerup imminut ataqatigiissinneqarnissaa ajornarnerulissaaq, suliffeqarfiillu namminersortut amerlanerulernissaannik anguniagaqarnermut tamanna aporfiliissaaq, Aningaasaqarnermut Siunnersuisoqatigiinni siulittaasoq Torben M. Andersen oqarpoq.
Pisortalli ingerlaqataqarfiisa annertusisimannerannut siunissamut aningaasaliissuteqarniarneq pissutaasoq, Aningaasaqarnermut Naalakkersuisqo Vittus Qujaukitsoq (NQ) Sermitsiaq.AG-mut allakkatigut akissuteqarnermini allappoq.
Inatsisartuni tapersersorneqarluartoq
- Piffissaq ungasinnerusoq eqqarsaatigalugu neriuutigineqarpoq, aningaasaliissutigisat taakku isumaginninnermi ajornartorsiutaasartut ikinnerulernerannik nassataqassasut, akileraartarnikkullu aaqqissuussaq suliffeqarfiit namminersortut aningaasaqarnerisa ineriariartornerannut siuarsaaqataassasoq.
- Taakku marluullutik inuiaqatigiit ineriartornerat pitsaanerusumik ingerlatilissavaat, aamma pisortat aningaasartuutikinnerulerneraannik Nunattalu Karsiata isertitaqarnerulerneranik kinguneqassapput, Vittus Qujaukitsoq allappoq.
Vittusip miserratiginngilaa, pisortat aningaasartuutaat naatsorsuutigisamit annertunerulersimasut, ilanngulluguli oqaatigaa, taamatut ingerlatsisoqarnera Inatsisartuni tapersersorneqarluartoq:
- 2015-imiit ulloq manna tikillugu partiit tamarmik (Suleqtigiissitsisut kisimik pinnatik) Naalakkersuisunut tapersersuisimapput. Piffissami pineqartumi pisortat aningaasartuuteqarneruleriartornerat amerlanerussuteqartunit isumaqatigineqarsimavoq, Vittus Qujaukitsoq allappoq.
Napatitsinissaq isumaqatiginninniarnerni qitiutinneqartoq
Vittusip oqaatigaa, taamatut ineriartortoqaraluartoq Nunatta Karsia ukiuni kingullerni sinneqartooruteqartarsimasoq, Naalakkersuisunulli suli pingaaruteqartoq, aningaasaqarnikkut napatitsinissamik ajornartorsiuteqartarnerup isumagineqartarnissaa.
- Piffissami aggersumi aningaasanut inatsisissaq partiinut isumaqatiginninniutigineqalerpat tamatuma qitiutinneqarnissaa aamma naatsorsuutigaara, Vittus Qujaukitsoq allappoq.