Topchef-exit
Vittus: Pisimasoq alianartorujussuaq
Aingaasaqarnermut akisussaasup Vittus Qujaukitsup, Siumut, nassuerutigaa namminersorlutik oqartussat Carsten Frank Hansen atorfinitsikkamikku kukkorujussuarsimasut
– Pisimasoq alianartorujussuaq atorparput. Carsten Frank Hansenip atorfinitsinneqannginnerani tassunga paasissutissanik pissarsiniarneq iluamik ingerlasimanngilaq.
Taamatut KNR-imut nassuerpoq aningaasaqarnermut nunallu iluani pissutsinut Naalakkersuisoq Vittus Qujaukitsoq, Siumut, taassumalu aamma Qujaukitsoq aperaa isumaqarnersoq naliliinermut ataatsimiititaliap, Siulittaasup Naalakkersuisoqarfiani pisortamit Svend Hardenbergimit siuttuuffigineqartup, suliani naammaginartumik suliarisimagaa.
– Naamik, Carsten Frank Hansenimut paasissutissat naammassimanngillat. Pissutsit pissusissamissut ingerlasimannginnerannut pasilliinermut innersuussutigiinnarsinnaavara Naliliinermut Ataatsimiititaliaq angummullu paasissutissanik pissarsisinnaasimannginnera, Vittus Qujaukitsoq KNR-mut oqarpoq.
Atuaruk: "Ramsdal ima akissarsisinneqarpoq - imaluunniit?"
Atuaruk: "Mamianartuliornerup kingorna sakkortuseeqqinneq"
Svend Hardenberg pingasunngormat oqaluttuarpoq Carsten Frank Hansen akuerineqarsimanngisaannarsimassagaluartoq ataatsimiititaliap ilisimasimasuuppagu Carsten Frank Hansen qallunaat politiivinit peqquserluuteqarsimasutut unnerluutigineqarsimasoq, siulisinnerusukkut Danske Andelskassers Bank-imi atorfeqarnerminut atatilugu.
– Carsten Frank Hansenip atorfinitsinneqarneranut aalajangernermut uanga Naliinermut Ataatsimiititaliami siulittaasutut akisussaasuuvunga. Tamanna qimarratiginiarsarinngilara, Svend Hardenberg oqarpoq.
Atuaruk: "Sulisussarsiorluni sulineq Hardenbergip isornartorsiorpaa"
Atuaruk: "Hardenberg: Soraarsitsineq apeqqutigisimanngilara"
Siunnersuinermik ingerlatsiviup Ramsdalip Carsten Frank Hansen nassaarisimavaa, Naliliinermullu Ataatsimiititaliap Ramsdalip suliai apeqqusersimagunanngilai.