oqallinneq
Vittus pillugu Løkke ernumassuteqanngitsoq
Ministeriunerup Lars Løkke Rasmussenip Vittus Qujaukitsup isornartorsiuinera artornarpallaanngitsutut tigugaa, KNR oqaluttuarpoq
Ministeriuneq Lars Løkke Rasmussen (V) isornartorsiuineq Kim Kielsenimeerpat aatsaat ernumanissamut pissutissaqalissaaaq. KNR taama oqaluttuarpoq.
Atuaruk: Vittusip Danmark USA-lu sioorasaarpai
Folketingimi oqallittoqarnerata kingorna, ministeriuneq sivikitsumik tusagassiortunik katersortitsivoq, tassanilu Vittus Qujaukitsup Politikenimut oqaatigisai pillugit aperineqarpoq.
- Naalakkersuisut siulittaasuata oqaatsit taama ittut atorlugit danskit naalakkersuisui isornartorsioraluarpagit aatsaat ernumalissagaluarpunga. Oqaatigineqaannartutut tiguakka, aammalu kinguneqartussatut isiginagit, aamma soorunami Kim Kielsen naapeqqikkukku tamanna pillugu oqaloqatigissavara, ministeriuneq oqarpoq.
Atuaruk: Namminiilivinneq ima aningaasalersorneqassaaq
Kim Kielsenimut pitsaasumik atassuteqartoq
Danskit aamma kalaallit naalakkersuisuini siuttut atassuteqarnerat pitsaarpasippoq.
- Isumaqarpunga pitsaasumik tatigeqatigiinnerlu tunngavigalugit suleqatigiittugut, aamma siunissami taamaattoqaannarnissaa kissaatigaara, Lars Løkke Rasmussen (V) oqarpoq.