Vittus ”Nunatta Karsianut ajorluinnartumik kinguneqartitsisoqarsinnaaneranik” mianersoqqusivoq
Namminersorlutik Oqartussat maannakkorpiaq ajornartorsiortoqarnerani soorunami aningaasatigut ikiuutissapput, soorlu Covid-19-ip tuniluunnerani taamaaliortoqarsimasoq, Aningaasaqarnermut Naalakkersuisoq Vittus Qujaukitsoq erseqqissaavoq. Nunattali Karsianit aningaasatigut ikiorserneqartarneq ulluinnarsiutaalissanngilaq, tamannami Nunatta Karsianut ajorluinnartumik kinguneqarsinnaavoq, taanna oqarpoq.
2020-mi ikiorsiissutinut aningaasartuutigineqarsimasut, miliuuninik pingasunik kisitsisitalinnik annertussuseqartut eqqarsaatigalugit Nunatta Karsianit koruunit tamarmik eqqarsarluaqqaarluni atorneqassapput.
Vittus Qujaukitsoq Sermitsiakkut allagaqarluni taamatut oqariartuuteqarpoq, tassani Kalaallit Nunaanni inuussutissarsiuteqartunut, KNAPK Kalaallillu Nunaanni Sulitsitsisut aqqutigalugit suleqatigiissitani, aalisakkat akiisa appariartornerat pissutigalugu sineriammut qanittumi aalisartunut ikiorsiissueqaqqittoqassanersoq pillugu naliliisussatut peqataasunut mianersoqqusivoq.
Aningaasatigut sillimmatit pilerseqqinneqassasut
- Aalisarnermullu namminersorlutillu inuussutissarsiortunut ikiorsiissutit nutaat qanorluunniit pisariaqartigigaluarpata akisussapput, inuiaqatigiinnilu aningaasaqarnikkut tassanngaannartumik eqqorneqarsinnaanitsinnut suli akiuussinnaassuseqartariaqarpugut, tamannalu aningaasatigut sillimmatit pilerseqqinneqarnissaannik pisariaqalersitsivoq. Naatsumik oqaatigalugu aningaasanik atuivallaarneq sianigisariaqarparput, Aningaasaqarnermut Naalakkersuisoq allappoq.
Itisiillunilu nangilluni:
- Taamaammat namminersorlutik inuussutissarsiortunut sukumiisumik piffissaq pineqartumi ajornartorsiortoqalertillugu, tassanngaannartumik piffissamilu killilimmi ikiorsiineq kisiat ingerlattariaqarparput, soorlu tamanna COVID-19-ip tunillaassuunnerani misigigipput. Tamanna inuussutissarsiortuni annikitsuaraannarmilluunniit kinguariartoqarnerani Nunatta Karsianit aningaasanik taperneqartarnerup ulluinnarsiutaalinnginnissaatut paasineqassaaq. Taama inississagutta tamanna Nunatta Karsianut suliffeqarfiillu unammillersinnaassusiannut kingunipiloqassaaq.
Ulorianartumut inissittoqarsinnaasoq
Vittus Qujaukitsoq isumaqarpoq, innuttaasut pisortanit ikiorserneqarnissamik naatsorsuutaat piviusorsiortuunngippata nuna inissisimanera ulorianartorsiulissasoq.
- Namminersorlutik inuussutissarsiortortavut aalisartortavullu ingerlatsivianni amigartoorutaata annertoqataanik Nunatta Karsianit taperneqartarnermik sungiussissappata navianassaaq. Taama pisoqarpat tamatuma namminersorlutik inuussutissarsiortortatta ingerlalluartut ingerlalluarumallutik ingerlatsinermik pisariillisaasarnermik suliaqartarnertik annikillisissavaat, Nunattami Karsiata amigartoorutit matujumaarmagit, forudser Vittus Qujaukitoq naatsorsuutigisaminik oqaaseqarpoq nangillunilu:
- Taamaattoqalissappat tamanna unammillersinnaassutitsinnik annertuumik sanngiinnerulersitsissaaq, taamaattoqalerpammi suliffeqarfiit nunat allaniit
unammillertitsinnit akisunerujussuanngussaagut. Tamannali suliffeqarfiit namminersortut pisortallu suliffeqarfiisa naammassisinnaasaasa annikinnerulernerannik kinguneqassaaq, tamannalu aamma namminersortut pisortallu inuttaasunut sullissinerisa akisunerulernerannik nassataqassaaq, Kalaallit Nunaata aningaasaqarneranut politikkikkut akisussaasoq nassuiaavoq.
Aningaasaqarneq patajaattoq
Oqaatigaali nunap aningaasaqarnera ullumikkut patajaatsusoq, ”2020-mili pisortat aningaasaqarneranni annertuumik amigartoornerup ataasiaannarluni pinissaa qulakkeertariaqartoq”, allakkami erseqqissaatigineqarpoq.
Allagaq tamaat Sermiatsiami atuaruk – ugguuna iserfigisinnaavat: