sila pillugu tikeraarneq
Vittus Kerryp tikeraarnissaa sioqqullugu: Annertuumik sulereernikkut piviusunngorpoq
Amerikamiut nunanut allanut ministeriat silaannaap kissatsikkiartornerata kinguneri nammineq takuniarlugit Ilulissanukassaaq
Juunip 17-ani Amerikamiut nunanut allanut ministeriat John Kerry pisortatigoortumik Ilulissanut tikeraassaaq, taanna Naalakkersuisunit aamma danskit naalakkersuisuinit aaqqissuussaavoq.
Atuaruk: John Kerry Nunatsinnut tikeraassaaq
Silap pissusaa allanngoriartortoq
Tikeraarnermi immikkut silaannaap kissakkiartornera taassumalu Kalaallit Nunaannut unammillernartui immikkut ukkatarineqassallutik. Taakku saniatigut politikkikkut oqaloqatigiinnissaq USA-p Issittumi Siunnersuisooqatigiinni siulittaasuuneranut pilersaarutit tikinneqarnissaat naatsorsuutigineqarpoq.
USA-p Kalaallit Nunaannik (Thule Air Base) illersornissakkut suleqatiginninnerat John Kerrymik ataatsimeeqateqarnermi tikinneqassapput.
Atuaruk: John Kerry nunatsinnukassamaalersoq
Iqalunni ataatsimiittut
Nunanut Allanut tunngasunut Naalakkersuisunut ilaasortaq, Vittus Qujaukitsoq (S), siornatigut John Kerrymik ataatsimeeqateqareerpoq, taanna Issittumi Siunnersuisooqatigiit ministeriisa aprilimi 2015 Iqalunni ataatsimiinneranni taamatullu GLACIER ministerit ataatsimiinneranni augustip 30-ani 2015 pisumi pilluni.
Tassani Kalaallit Nunaannut tikeraarsinnaaneq eqqartorneqarpoq.
Ukiuni arlalinni suliaq
- Namminersorlutik Oqartussat ukiuni arlalinni annertuumik sulereernerisigut tikeraarnissaq piviusunngorpoq, tassani Kalaallit Nunaata Washingtonimi aallartitaqarfia USA-mi aalajangiisinnaasunut saqqumilaarsitsilluarneratigut ingerlasimalluni, Vittusa Qujaukitsoq tusagassiuutinut nalunaarummi allappoq.
- Tikeraarnerup ersersippaa suleqatinut qaninnernut qanilaartumik peqataanissap qanoq pingaartiginera ersersippaa, John Kerryllu tikeraarnissaanut qilanaaqaanga, tassanilu USA-p illersornissamut suleqatiginera qulequttatut pingaarutilipilussuartut qaqinneqartussaavoq.