aallarnisaasut
Vittus: Ingerlatsivimmik 1 koruunilerlugu aallartitsigit
– Ingerlatsivinnut mikisunut namminersortunut tunngavissaqartitsissaagut, ilaasa alliartuaarfigisinnaasaannik. Tamanna aningaasarsiornikkut siuariartornermik qulakkeerinneqataassaaq, Vittus Qujaukitsoq oqarpoq
Inatsisartut upernaakkut ataatsimiinneranni Naalakkersuisut inatsimmut allannguutissatut siunnersuutaat akuersissutigineqassappat aallartitsisunut selskabimik pilersitsinissaq aningaasatigut ajornannginnerulissaaq.
Taamaasilluni aallartitsiniartut 1 koruuniinnarmik aallartitsissuteqarsinnaassapput. Tamannali peqatigalugu inatsisikkut aalajangersimasumik piumasaqaataassaaq sinneqartoorutit ilaat ingerlatsiviup aningaasaqarnikkut annertusarneranut atorneqassasut.
Tamannalu aamma peqatigalugu ingerlatsiviup aallartisarnerani aallarnisaasunut siunnersorneqarnermut aningaasatigut ikiorserneqarnissaq ajornannginnerulissaaq.
Iluatsitsilluarsimasut
– Aktieselskabit anpartselskabillu kisiisa pigissanngilagut. Aamma aallarnissaasunut selskabeqassaagut, 1 koruuniinnarmik aningaasaliillutik aallartitsisinnaasunik, inuussutissarsiornermut, sulisartoqarnermut, niuernermut nunanullu allanut tunngasunut Naalakkersuisoq Vittus Qujaukitsoq (S) oqarpoq.
Taamaasilluni Maniitsumi Lilleholm Food kiisalu Oqaatsuni qulluukkanik tunisassiorfik iluatsitsilluartumik aallartissimasutut eqqaavai.
Inuussutissarsiutit siuarsarnissaannut Naalakkersuisut suliniuteqarnerat Sermitsiaq normu 16-imi annertunerusumik atuaruk. Aviisi ataani linki atorlugu pisiarisinnaavat