Vittus atsiortitsisaqattaarnissamut piareertoq
Nunatta Qitornai qinersisoqaqqinnissaanut piareersimassaaq, partiimik pilersitsisimasoq oqarpoq.
Partiimi siulittaasoq partiimillu pilersitsisoq Vittus Qujaukitsoq qaammatini arlalinni tusarfigineqarsimanngereerluni, atsiortitseqattaarnissamut piareersimanerarpoq, Nunatta Qitornai tullissaanik qinersisoqarnissaanut qinigassanngortitseqqissinnaalernissaa anguniarlugu.
Vittus Qujaukitsoq Sermitsiaq.AG-mut taamatut oqaluttuarpoq:
- Atsiornernik katersiartoqqissaagut. Aallaqqaataaniit aallarteqqissaagut, tamannalu ajornaatsuinnaanngilaq, naammassisinnaassavarpulli, taanna oqarpoq.
Sermitsiaq.AG-p partiip naatsorsuutai qaammatinik arlalinnik kinguaattoorluni tunniunneqarsimasut Inatsisartut nittartagaatigut saqqummiunneqarsimasut pillugit partiip siulittaasua oqaloqatigismavaa.
Naatsorsuutit kinguaattoorfiusimasut
Naatsorsuutit siorna juunip 30-ani tunniunneqareersimasussaagaluarput, Vittus Qujaukitsulli nassuiaatigaa, partii siorna upernaakkut Intsisartunut qinersisoqarmat Inatsisartunut isertitaqannginnera pissutigalugu kiisalu coronap tuniluunnera pissutigalugu partiimi suliaqartoqarpallaarsimanngimmat naatsorsuutit aatsaat qanittukkut tunniunneqarsimasut.
Partii aningaasaqarnermigut inissisimalluarpoq. Partii 2020-mi 324.793 koruuninik sinneqartooruteqarsimavoq, sinneqartoorutillu partiimut ingerlateqqinneqarsimallutik, taamaalilluni partiip nammineq aningaasaatai 610.176 koruuninut qaffassimallutik.
- Sinneqartoorutaasut ajunngilluinnarput aamma nammineq aningaasaatit patajaattuupput, Vittus Qujaukitsoq naatsorsuutit pillugit oqarpoq.
Upernaap ingerlanerani atsiortitseqattaarniartut
Partiimik pilersitsisimasoq eqqarsarfeqareerluni atsiortitseqattaaqqinnissamut piareersimavoq. Partii 2021-mi upernaakkut Inatsisartunut qinersisoqarmat 639-nik taaguunneqarsimavoq qinigaaqqinngittoorlunili. Taamaammat partii qinigassanngortitseqqissinnaalernissaq anguniarlugu atsiortitseqattaarniarpoq:
-Atsiornerit pisariaqartinneqartut upernaap ingerlanerani pissarsiariniarlugit aallartissaanga, partiimik pilersitsisimasoq oqarpoq.
Nunatta Qitornasa politikkeri nuimasoq siorna ukiakkut annaavaat, Aleqa Hammondip partiimi ilaasortaajunnaarluni partiitoqqaminut Siumumut ilaasortanngoqqissimanini siorna ukiakkut nalunaarutigimmagu.
Vittus Qujaukitsoq 2018-imi Inatsisartunut qinersisoqarnissaa sioqqullugu kingullermik atsiortitseqattaarpoq, qinersisoqarnerani Nunatta Qitornai ataatsimik isertitaqarput, taamanikkullu Naalakkersuisunut siulittaasuusup Kim Kielsenip naalakkersuisuutitaanut ilaalerlutik.