Vittup atsiornerit ullumi tunniutissavai
Nunatta Qitornai qineqqusaarnissamut piareerluni nalunaaruteqarpoq
Vittus Qujaukitsup atsiornerit siullermik amigaatigisani ullaap tungaani tunniunniarpai.
- Atsiornerit nutaat ullaap tungaani kommunimut tunniukkiartorniarpakka, taanna Sermitsiaq.AG-mut oqarpoq.
Taamaalilluni Nunatta Qitornai apriilip 24-anni taasinermi allaffissami allaqqanissaat maanna ilimanarsivoq.
Aallaqqaammut atsiornerit 200-t atuutsinneqanngillat, taakku Atassummut atsioreersimanerat pissutaalluni. Sapaatip-akunnerata siuliani ataasinngormat, qinersinissap nalunaarutigineqarfiani tamanna paasinarsivoq.
Kisianni maanna atsiornerit naammattut katersorneqarsimalerput, partii qinigassanngortitsinissamut qulakkeerinilluni misigimmat.
Vittus Qujaukitsup sapaatip-akunnerani kingullermi Sermitsiaq.AG-mut oqaluttuaraa, namminiilivinnissap sukkasuumik pinissaata saniatigut USA-mut Danmarkimullu sukannernerusumik killiliisoqarnissaa kissaatigalugu. Tamatuma saniatigut inuussutsissarsiornikkut eqeersimaartumik politikkeqarnissaaq kissaatigaa, suliassallu agguataarneqarnissaat ukkatariniarlugu.
Sapaatip-akunnerata naanerani partiip anguniagaanik peqqissaarnerusumik piariigaqarniarluni taanna oqarpoq. Maannamut kikkut allat Nunatta Qitornai tunuliaqutaralugit qinigassanngortinniarnersut saqqummiunnissai kissaatiginngikkallarpaa.
Suleqatigiissitsisut ippassaq atsiornernik tunniussipput. Taamaalillunilu qinersinermi partiit nutaat marluk illuatungeriit peqataasussanngorpasipput.