Visit Greenland: New York Timesip allaaserinninnera nittarsaassineruvoq pitsaasoq

Nutaarsiassaqartitsiviup New York Timesip ukioq 2020-mi angalaffiusussatut innersuussutaanni Kalaallit Nunaat peqataatinneqaqqimmat, Visit Greenlandip nuannaarutigaa. Visit Greenlandimit neriuutigineqarpoq ukiuni tulliuttuni takornariat amerlanerusut tikittalissasut.

Nunat allat Kalaallit Nunaannik soqutiginninnerat nuannerpoq.
Pingaartumik takornarialerinermik nunamillu nittarsaassinermik suliaqartuulluni.

- Soorunami Kalaallit Nunaat 2020-mi angalaffissatut innersuussanut ilanngunneqaqqimmat nuannaarutigaarput. Nutaarsiassaqartitsivik atuartartorpassuaqarpoq, tamannalu uagutsinnut iluaqutaassaaq, Visit Greenlandimi souschef, Mads Skifte Sermitsiaq.AG-mut oqarpoq.

Takornariaqarnerulernissaq neriuutigaat

Visit Greenlandip ukiuni tulliunni takornariat qassit tikissinnaassanersut naatsorsornissaannut eqqoriarnissaannulluunniit tunuarsimaarpoq.

- Soorunami pissanganarpoq soqutiginninnerulerneq Kalaallit Nunaanni takornariaqarnermut qanoq isumaqassanersoq. Neriuuteqarpugut, qassilli tikissanersut eqqoriarnissaannut tunuarsimaarpugut, Mads Skifte oqarpoq.

Trump pissutigalugu nittartagaq alakkarneqarnerusoq

New York Timesilli angalanissamut innersuussutaat kisimik Kalaallit Nunaata nunanit allanit soqutigineqarnerulerneranut pissutaanngilaq.

USA-p præsidentiata, Donald Trumpip Kalaallit Nunaannik pisinissaminut soqutiginnilluni siorna augustimi oqarpoq, tamannalu nunatta saqqumilaarneranut aamma sunniuteqarpoq.

- Sapaatip akunnerata naanerani tassa nittartagarput nalinginnaasumit 788 procenteriaammit alakkarneqarneruvoq, nittartagattalu qupperneqartarnera ukiup siulianut sanilliullugu 2019-imi 38 procentimik qupperneqarnerusimalluni. Nittartakkatsinnik alakkaasut ilaat Kalaallit Nunaannut tikikkumaarnissaat neriuutigisinnaavarput, Mads Skifte oqarpoq.

- Nutaarsiassaqartitsiviit nunanit allaneersut taamani attavigisaqattaarpaatigut. Amerikami nutaarsiassaqartitsivimmiinnaanngitsoq, aammali nunanit allaneersut. Taamaattumik takornariarusussinnaasut suli amerlanerusut Kalaallit Nunaannik ilisimasaqalerput, siunissamilu tikittoqarnerusalernissaa neriuutigisinnaavarput.

Powered by Labrador CMS