Visit Greenlandimit umiarsuarmik takornariartitsineq erseqqissaaffigineqarusuppoq
Visit Greenlandimit piffissami kingullermi umiarsuarnik takornariartarneqoqallisaareersoq, umarsuarnik takornariaqartarnermi unammillernarsinnaasut iluaqutaasinnaasullu erseqqissaaffigineqarusupput. Svalbardimiit kisitsisit takutippaat, nalinginnaasorsiortumik umiarsuarnik takornariartitsineq aqqutissaanngitsoq.
Svalbardimi umiarsuarmik takornariartitsisarneq pillugu nalunaarusiap takutippaa, Norgemi ilisimasassarsiorluni umiarsuarnik takornariartitsisarneq nalinginnaasorsiortumik umiarsuarnik takornariartitsisarnermut sanilliullugu piujuartitsisumik ineriartortitsinermut tapersiinerusartoq.
Visit Greenlandimit tamanna misissuisimanerillu allat tunngavigalugit periusissiaq ”Takornariaqarnerunerup tungaanut, 2021-2024” aqqutigalugu aalajangertoqarpoq,
nalinginnaasorsiortumik umiarsuarnik takornariartitsinermut siuarsaanissamut ikorfartuisoqassanngitsoq.
Tamanna isumaqarpoq immikkoortortap taassuma tuniniaaviginissaa, Visit Greenlandip
isumalluutinik atuiffiginianngikkaa. Soorlu aamma niuvernikkut saqqummersitsinerni allanilu
nunat assigiinngitsut akornanni suliniutini nalinginnaasorsiortumik umiarsuarmik
takornariartaatsitigut siunertallit ilaaffigineq ajorai, Visit Greenlandimit tusagassiorfitsigut nalunaaruteqarnermi ilisimatitsissutigineqarpoq.
Svalbardimut assersuunneqarsinnaasugut
Nalunaarusiami “Cruise Study Svalbard”(2019)"-imi misissorneqarsimavoq, Svalbardimi umiarsuarnik nalinginnaasorsiorluni takornariartitsisarnerup aningaasatigut qanoq iluaqutaatigisarnera.
Visit Greenlandimit oqaatigineqarpoq, nalunaarusiaq Kalaallit Nunaanni sanaajunngikkaluartoq, Svalbardimi takornariarfissat Kalaallillu Nunaanni takornariarfissat amerlasuut assigiissuseqartut, umiarsuarnik takornariat atueriaasaannik uagutsinnut takutitsisinnaasut.
Nalunaarusiami ilaatigut takutinneqarput:
- Nalinginnaasorsiortumik umiarsuarnik takornariartaatsit Issittumukartartut
anginerukkajupput, angalanermilu ataatsimi ornitassat arlallit angusarlugit. Saniatigut
AECO-mut (The Association of Arctic Expedition Cruise Operators) - ingerlatsinermut
sakkortuumik piumasaqaateqartumut ilaasortaaneq ajorput. - Issittumi ilisimasassarsiorluni umiarsuarnik takornariartaatsit 500 angunagit
ilaasoqartarput, ikinnerusunik ornitaqartarlutik AECO-mullu ilaasortaasarlutik. - Ilisimasassarsiorlutik umiarsuarmik takornariat sumiiffimmi atuinerat,
nalinginnaasorsiorluni umiarsuarmik takornarianut naleqqiullugu 5,2-riaammik
annertunerusarpoq. - 2018-mi Svalbartimi umiarsuarmik takornariat 62.300 missaanniissimapput, taakkulu
72,4%-ii nalinginnaasorsiorluni umiarsuartigut takornariartuusimapput, 27,6%-iilu
ilisimasassarsiorlutik umiarsuartigut takornariartuusimallutik. - Tamakkiisumik Svalbartimut 109,5 mio. NOK-inik isertitsisimapput – 66,7%-ii
ilisimasassarsiorlutik umiarsuartigut takornarianeersuupput, 33,3%-iilu
nalinginnaasorsiortumik umiarsuartigut takornariartuneersuullutik.
Aasaq manna coronap atuunnerata kingorna umiarsuit takornariartitsisartut amerlasoorsuit tikittalermata Kalaallit Nunaanni umiarsuarnik takornariaqarneq annertuumik
oqallisaavoq. Ilaatigut isumaqartoqarluni umiarsuarnik takornariartaatsit amerlavallaat
Kalaallit Nunaanni umiarsualivinnut aqqusaartartut, naak tassani inatsisitigut malittarisassat
aamma annikikkaluartut.
Poltikkerinut inassuteqaasiorniartut
Visit Greenlandinimit oqallinnermi isummat illugiit akuerai taamaalillunilu oqallisigisaq
pillugu erseqqissaanerunissamut atugassanik pilersitsinissamik aalajangiisoqarluni. Nuna
tamakkerlugu takornariaqarnermut siunnersuisoqatigiit ukioq manna piffissami
umiarsuarmik takornariarfiusartumi, takornariaqarnermik inuussutissarsiortut
suleqatigalugit Kalaallit Nunaanni umiarsuarnik takornariartitsinermi ineriartortitsinissamut
innersuussutissanik pilersitsiniarluni aalajangiussivoq.
- Sumiiffinni pineqartuni unammillernartut iluaqutissallu pillugit uagut
paasisaqarnerorusuppugut. Taamaammat suliniummik peqataatitsisumik aallartitsivugut,
umiarsuanik takornarialerisut kalaallit, oqartussat, sumiiffinni assigiinngitsuni pineqartuni
takornariaqarnermi suliaqartut soqutigisaqaqatigiillu allat suleqatigalugit, Visit Greenlandimi pisortaaneq Anne Nivikka Grødem nassuiaavoq.
Suliniut siunnersuutinik arlalinnik kinguneqartitsissaaq, takornariaqarnermi malittarisassanik
aggersunik suliaqarnissamut iluaqutissanik, pisortaaneq oqaluttuarpoq.