Visit Greenlandimi pisortanngortoq: Takornariartitsineq Nunarput tamakkerlugu iluaqutaassaaq

Anne Nivíka Grødem Visit Greenlandimi pisortanngussaaq. Suliassamik kivitsisussatut taanna eqqortuusoq, siulittaasoq isumaqarpoq.

Nunarput najugaqarfigiuminartuullunilu tikeraarfigilluaruminartuussaaq, Anne Nivíka Grødem oqarpoq.

Hjörtur Smarasonimut apriilimi ukioq ataaseq atorfeqareerluni soraarsitaasumut taartissamik Visit Greenland nassaarpoq.

Nuna tamakkerlugu takornariartitsinermut siunnersuisoqatigiinnit tusagassiuutinut nalunaarummi tamanna atuarneqarsinnaavoq.

1. august Anne Nivíka Grødem Visit Greenlandimi pisortatut inissivissaaq, taanna Hjörtur Smarasonip soraarneraniilli pisortaagallartutut atorfeqarpoq. Tamanna sioqqullugu ingerlatseqatigiiffiup siulersuisuini siulittaasup tulliatut atorfeqarpoq, tassanilu pisortaasimasup soraarsitaaneranut aalajangeeqataanikuulluni.

Takornariartitsisarnerup ineriartortinneqarnerani nunaqavissumik aallaaveqarnissamik siulersuisut kissaateqarneranni, taassuma pisortatut toqqarneqarnissaa taakkununnga pissusissamisoorpoq.

Anne Nivíka Grødem Sermersooq Businessimi pisortap tulliatut atorfimmeerpoq, inuussutissarsiutit aammalu tikitassat ineriartortinnerinik suliaqarnermik ingerlatsiffigisaminit. Taanna Ilulissani inunngorpoq tassanilu peroriartorluni, nunatsinnilu suliniutinik aallarnisaanermik sulianillu aqutsinermik aamma misilittagaqarluarluni.

- Nunatta ornitassatut aammalu tikitassaqqissutut nunani tamalaani nittarsaannerata saniatigut, nunap immikkoortuini DMO-t takornariaqarnermut tunngasunik suleqatiginissaannik aallussinissaq Visit Greenlandip pingaartitaraa, nunap ataqatigiissumik aammalu takornariaqarnerup nunatsinnut tamakkiisumik iluaqutaanissaa siunertaralugu, Visit Greenlandimi siulittaasoq, Annette Grønkjær Lings oqarpoq:

Sinaakkutinik pitsaanerpaanik pilersitsinissaq

Anne Nivíkallu pisortatut nutaatut Visit Greenlandip 2021-miit 2024-ip periusissiaa ”Takornariaqarnerulernissamik siunertaq” siuttuuffigilissavaa, takornariaqarneq nunaqavissunit peqataaffiginneqarlunilu piginneqataaffiusoq aallutissallugu. Nunatsinni attaveqaasersuinermi allanngoriartorneq, takornariaqarnerup ineriartortinnissaanut periarfissiilluartoq, piffissami matumani inuiaqatigiittut aqqusaaripput, Anne Nivíka Grødem isumaqarpoq.

- Ineriartornerullu tamakkiisumik inuiaqatigiinnullu naleqartitanik ineriartortitsisoq uannut pingaaruteqarpoq. Takornariammi avataaniit isiginnaartuuinnaratik nunatsinni ulluinnarni inuunermut piffissami sivikitsumi akuunissaq misigerusuttarpaat”, Anne Nivíka Grødem oqaluttuarpoq, nangillunilu:

- Nunarput nunagiuminartuullunilu tikeraagassaqqissuussaaq. Uangalu nunatsinni takornariaqarnermik ingerlatsisutut tikitassat piujuartitsineq tunngavigalugu ineriartortinneqarnissaat, nittarsaassinittalu takornariartussat taamatut naleqartitsisut siunnerfigissagai pingaartippara. Tamaasilluta takornariaqarnerup nunarput tamakkerlugu iluaqusiinissaa qulakkiissavarput.


Powered by Labrador CMS