Visit Greenland pitsaassutsimik meqqiliisalerniartoq
Takornariartitsisarfiup misigisassarsiorlutik takornariartartut, pitsaalluinnartunik neqeroorfigineqarusuttartut takornariarnissamut pilerisutsilerniarpai, Visit Greenlandimit nalunaarutigineqarpoq
Takornariartitsisartut siunissami pitsaassutsimik meqqilerneqartalissapput.
Visit Greenlandip 2023-p tungaanut periusissiaani tamanut saqqummiunneqaqqammersumi tamanna atuarneqarsinnaavoq.
Takornariartitsisartummi misigisassarsiorlutik takornariartartut takornariartitassatut anguniagaasa sisamat ilagaat. Misigisassarsiorluni takornariartitsinemi pinngortitaq, kulturi timimillu atuineq atorneqartarput.
- Taamaammat pingaaruteqaroq, uagut takornariartitisartutut aamma inuussutissarsiutitsinni tunisassiatta kiffartuussissutittalu misigisassarsiorlutik takornariartartunut naleqqussarneqarnissaat, periusissiami allassimavoq.
- Amerlanerit takornariartikkusulerniarlugit soqutiginninnerlu taamaatsiinnarniarlugu takornariartitassatta pitsaassusaat misigisassarsiortitsinissarlu Kalaallit Nunaanni takorniariartitsisarnerup ineriartortinneqarnissaanut tunngaviusariaqarput.
- Pitsaassutsimik meqqiliinermi isumannaallisaaneq, pitsaasumik kiffartuussinissaq, avatangiisinik kulturimillu eqqarsaatiginninnissaq eqqarsaatigigaanni, inuussutissarsiut pitsannngorsartuarneqassaaq pitsanngorsaanerlu angusaqarfiusassalluni.
Visit Greenlandimit neriuutigineqarpoq, taamatut meqqiliisalernissamut aningaasaliissuteqartoqarumaartoq.
Visit Greenlandip 2023-p tungaanut pingaarnertut anguniagarai:
Misigisassarsiorlutik takornariarusuttartut amerlanerulersinneqarnissaat
Kalaallit Nunaanni tamarmi ukioq naallugu takornariartitsisalernissaq
Ilisimasanik avitseqatigiittarnissaq piginnaasaqarnerulersitsinissarlu
Atugassarititat iluaqutaasartut siuarsarneqarnissaat