Visit Greenland islandermiumik pisortartaarpoq
Julia Pars Visit Greenlandimi pisortatut taarserlugu islandermiu Hjörtur Smarason pisortanngussaaq.
Hjörtur Smarason Visit Greenlandimi pisortanngussaaq, suliassarissavaalu Kalaallit Nunaanni takornariaqarnerup aallartisaqqinnissaa.
Visit Greenland tusagassiutinut nalunaarummi allappoq.
- Kalaallit Nunaanni takornariaqarneq mittarfiit nutaat periarfissanik nutaarluinnarnik pilersitsisussat peqqutigalugit piffissamut pissanganartorujussuarmut ingerlavoq. Piffissami pilersitassat aningaasaliiffiusussat tunisassianillu nutaaliornerit suliffissanik pissanganartunik Kalaallit Nunaanni pilersinneqassapput, Hjörtur Smarason tusagassiutinut nalunaarummi oqarpoq.
Apriilip aallaqqaataanit atorfinissaaq
Takornarialerinermi suliffeqarfiit coronap ajornartorsiortitsinera qaangiuteriarpat periusissiamik suliaqarnissamut pingaartitsissalluni oqarpoq, taanna takornarialerinerup tungaatigut ingerlaqqinnissaannut iluaqugissagaa oqarpoq.
Hjörtur Smarason Copenhagen Business Schoolimi cand.merc.-itut ilinniagaqarpoq ukiorpassuarnilu misilittagaqarfigalugit branding aamma attaveqaqatigiinneq. Siusinnerusukkut suliarisimasaanut ilaapput Issittumi, Asiemi Afrikamilu attaveqaqatigiinnikkut periusissiorneq, takornariaqarnikkut inerisaaneq kiisalu ajornartorsiortoqartillugu aqutsineq.
Julia Parsip pisortatut soraarnerata Hjörtur Smarasonillu pisortanngornissaata tungaanut pisortap tullersortaa Mads-Daniel Skifte pisortaagallassaaq.