Virusi: Royal Greenland naalarnisoq
Kinami coronavirusip tuniluunnera Royal Greenlandimut qanoq kinguneqassanersoq oqaatigissallugu siusippallaarpoq. Ataaserli qularnanngilaq: Kalaallit Nunaanni aalisarneq sunnerneqassaaq.
Tuniniaanermi pisortap Bruno Olsenip niuerfiup pingaarnerpaap coronavirusimit eqqugaasimanera Royal Greenlandimut qanoq akeqassanersoq siulittuutigerusunngilaaa.
- Kinami inuit angalaaqqusaajunnaarnerat kinguneqarpoq. Tamatumami malitsigisaanik neriniartarfiit matuneqarsimanerat atuinikinnerunermik nassataqarpoq. Qanorli tamanna uagutsinnut kinguneqassanersoq oqaatigissallugu suli siusippallaarpoq, Bruno Olsen Sermitsiaq.AG-mut oqarpoq.
Sulisut suli tikinngittut
Royal Greenlandip suliffissuaataa, ilaatigut Japanimi niuerfimmut sushinik tunisassiortartoq Kinap ukiortaarsioreernerani aallartisaqqileruttorpoq.
- Sulisulli ilaat pissutsit pissutaallutik uteqqissinnaasimanngitsut amigaatigaavut, tuniniaanermi pisortaq ilisimatitsivoq.
Containerinut umiarsualiviit qerititsviillu Kinap kujataata tungaaniittut ulikkaavipput, containerinilli assartueqqilernissaq maanna ammaanneqarpoq.
- Tassa umiarsualiviit inissaqaqqilissapput, tunisassiavullu apuuffissaminnut apuunneqarsinnaanngorlutik, Bruno Olsen ilisimatitsivoq.
Ulapaarfiunnginera qujanartoq
Ataaserli nuannaarutissaavoq, tassa qaleralinnik tunisassiornermut tunngasoq.
- Pissutsit taamatut inissisimatillugit, qaleralinnik avammut niueruteqartarnermut tunngatillugu ulapaarfiunnginnera nuannaarutigaarput. Aatsaammi maajip juunilluunniit qaammataani annertuunik avammut niueruteqalersarpugut, tuniniaanermi pisortaq nassuiaavoq.