Virusi: Kinami illoqarfiit arlallit matuneqartut

Illoqarfissuarmi Wuhanimi virusip atuutilernerata kingorna illoqarfimmi ungasinngitsumiittumi pisortat angallassinerat tamarmi unitsinneqarpoq.

Kinami illoqarfimmi Huanggangimi Wuhanip ungasinngisaaniitumi oqartussat pisortat angallassinerat tamaat unitsippaat. Taama pisoqarpoq tamaani SARS-imut assingusumik virusimik atuuttoqalersimanerata kinguneranik.

Wuhanimi Huanggangilu qitiusoqarfiit annerusumik minnerusumilluunniit matuneqarsimalerput.

Wuhanimi, illoqarfissuarmi umiarsualiveqarfiusumi, nunap immikkoortortaani Hubei-imi qiterpasissumiittumi 11 millioninillu innuttalimmi, innuttaasut sisamanngornermi nalunaarfigineqarput, illoqarfik ”immikkut pissutissaqartinnatik” qimassinnaanngikkaat.

Illoqarfimmit timmisartuussinerit qimuttuitsullu unitsinneqarput, aamma uivernermut annilaanganermullu takussutissarpassuaqarpoq. Illoqarfik Huanggang, 7,5 millioninik innuttaqartoq, pisortat angallassinerannik unitsitsiinnarsimanngilaq, aammali filmertarfinnik, internetcafenik niuerfimmillu qitiusumiittumik matooraasimalluni.

Illoqarfimmi aamma allami, Ezhoumi, illoqarfiup qimuttuitsunut unittarfeqarfissua ajornartorsiorneq pillugu matugallarneqarpoq.

- Allaanngivippoq nunarsuarmik aserortorsiuliinnartugut. Ikiorneqarnissamik pisariaqartitsilluinnarpugut, Wuhanimi innuttaasoq Kina nittartakkami inuit attaveqatigiittarfianni, Weibomi, Twitterimut eqqaanartumi, allappoq.

Tunillatsissimasut amerlanerpaartaat Wuhanimi, Kinap qeqqaniittumi, nassaarineqarput.

WHO ataatsimiittoq

Nunarsuarmi peqqinnissaq pillugu kattuffissuarmi WHO-mi immikkut ilisimasallit 16-it pingasunngornermi unnukkut ataatsimiipput. Ataatsimiinneq pinasuartumik aggersarneqarfiuvoq, tamatumanilu virusi nunat tamalaat akornanni peqqissutsimut aarlerinartorsiortitsisuunersut isummerfigineqartussaalluni.

Tuluit Nunaanni pingasunngornermi upalungaarsimaniarnermi iliuusissanik suliaqartoqarpoq, Wuhanimullu pisariaqanngitsumik angalanerit tamaasa mianersoqqussutigineqarlutik.

Thailandimi, Korea Kujallermi, Japanimi, Taiwanimi USA-milu virusip atuutilersimanera uppernarsarneqarpoq. Pisuni tamani inuit virusip ilisimaneqanngitsup aallaavigisaatut isumaqarfigineqartumi Wuhanimiissimasut pineqarput.

Nunarsuarmi nunani arlalinni ilaasut Wuhanimeersut misissuiffigineqartalerput.

Tamanna atuuppoq ilaatigut USA-mi, Australiami, Japanimi, Thailandimi, Singaporemi aamma Korea Kujallermi.

Powered by Labrador CMS