Vild med dans: Nukâka Silasilu nr. 3-nngorput
Nukâka Coster-Waldau qiteqatinilu Sila Holst ajugaaniutivinnermi pitsaanerit pingajuattut inissipput.
Nukâka Coster-Waldau aamma qiteqatigisaa Silas Holst Vild med dansimi arfininngornermi ajugaaniutivittoqarmat valsimik qiteqatigiipput, freestylemilu qiteqatigiillutik.
Alutornarluinnartumilli qitikkaluaramik ajugaanngitsoorput, nr. 3-tulli inissillutik. Isiginnaartitsisartoq Merete Mærkedahl aamma qitittartoq Thomas Evers Poulsen ajugaapput.
Isiginnaartut qujaffigai
Illunnaariit katillugit 138 pointinnapput, taakkunannga 38 pointit freestylemi pissarsiaralugit.
Aalajangiisoqareernerata kingorna Nukâka Coster-Waldau Facebookimini tapersersuisimasunut qujavoq:
- Tulluusimaaqaagut qujamasungaarlutalu finaalimut anngukkatta.....allanalaartunik misileeraasaqattaarluta, nuanneq misingisarpassuit. Qanorluunniit inuit isumaqaraluarpata uangut nuannaarjussuarpungut. Qamannga pisumik qujavugut. Qittarinnerit ajugaapput, quppernermini kalaallisut taama allappoq.
Nersualaarneqartut
Nukâka Coster-Waldau aamma Silas Holst qitereernermik kingorna nersualaarneqarluarput:
- Qanorluunniit oqaaseqarnissaq nalunarpoq. Unneqqarillunga oqassaguma, pikkorissorsuuvusi. Assorsuaq nuanneqaasi. Sapiissuseqarlusi saqqummertarnersi nuannareqaara. Allat isumaat aallaaviginagit, namminerli piginnaasat soqutigisallu aallaavigalugit takutitsisarnersi allat aamma ilinniarfigisinnaalluarpaat, naliliisartut ilaat, Marianne Eihilt oqarpoq.
- Ilissi unamminermi pingaaruteqarluinnartutut suli inissisimavusi. Pinngorartitsisinnaassusersi attatiinnartuarsimavarsi, Jens Werner oqarpoq.
Freestylemik qitinnerat uani takusinnaavat. Qitinnerup aallartinnerani kalaalerpaluttumik aallartipput, torlorsornertalimmik: