Nuummi mittarfeqarfissaq aatsaat 2024-imi piareertussaagaluartoq, maanna illup ilua qanoq isikkoqassanersoq alakkarterneqarsinnaalereerpoq, tassani akitsuutitaqanngitsunik pisiniarfiit, paasissutissiisarfiit aamma timmisartunut ikiartortarfiit videoni arlalinni takuneqarsinnaalereerput.

Illu terminaleqarfissaq 2023-p naanerani piariissasoq naatsorsuutigineqartoq, KAIR-imi suliniummut pisortap, Aviaaja Karlshøj Knudsenip oqaluttuaraa, suliniutillu tamakkiisup 2024-mi piariinnginnerani tassanngaanniit sullissisoqartaleriissaaq.

- Piffissami tassani suliniutip affaanut killissimanerput angalasut malugisinnaalissavaat.

Inini quleriinni siullermi videomi takuneqarsinnaasutut, pilersaarutit malillugit pisiniarfeqassaaq, ilaasunut issiaartarfeqassaaq, timmisartumi inuttanut issiaartarfeqassaaq aamma mittarfimmi sulisunut inissaqassalluni.

Akitsuuteqanngitsunik pisiniarfeqarfik angisooq allermiissaaq, inuussutissarsiortuniillu soqutiginnilluartoqalereerpoq, suliniummi pisortaq oqaluttuarpoq.

- Najukkami inuussutissarsiortunit tassani pisiniarfeeraqarnissamik soqutiginninneq annertuvoq, tamanna pitsaalluinnarpoq. Ukiup aappaa avillugu ingerlanerata qanoq ataqatigiissaarneqarnissaat inississavarput.

Mittarfiup ilassaa siulleq aggustimi asfaltilersorneqaleriissaaq, taanna novembarimi atulissaaq. Piffissami tassani aamma terminalip illutaa siulleq nappaanersiorneqassaaq, Kalaallit Airportsilu 4. septembarimi illumik ammatitsippat takusassaqarumaarpoq.

- Siorna aaqqissuussami inuit 600-nit amerlanerusut alakkarteripput. Silaginnissaa aamma ukioq manna taama amerlatigisut takkunnissaat neriuutigaarput, tassani suli takusassaqarnerussaaq.