arsaanneq
Videomik teknologiip atorneqalernissaa Fifa-p akuersissutigaa
Kukkusumik aalajangiisoqarnissaa pinngitsoortinniarlugu dommerit piffissami misileraaffiusumi aalajangersimasumi videokut immiussat ikiortigisinnaalerpaat
Sivisuumik oqaluuserineqarsimavoq arsaannermi dommerit pisunik aalajangiinissaminnut videokut immiussat ikiortigisinnaaneraat.
Arfininngormat The International Footboll Association Boardip (Ifab), arsaannermi inatsisinik aalajangiisartup, aalajangiuppaa europami ligani arlalinnni videokkut immiussat atorneqarsinnaanerat misilerarneqassasoq.
Tamanna piaarnerpaamik pissaaq, kingusinnerpaamillu sæsonimi 2017/2018-imi. Taamatut allapput nutaarsiassaqartitsiviit arlallit.
Videokut immiussat atorneqartassapput isertitsinerup, aappalaartumik nittaalluni anitsitsinerup, straffernerullu qularnartoqartinneqarnerini, aammalu ´ajortuliortup´ eqqortup kinaassusersineqarnissaanut - kingullermi pineqarpoq arsartartup ajortuliortuunngitsup mianersoqqussummik sungaartumik nittaavigineqarnissaa pinngitsoortinniarlugu.
– Arsaannermi oqaluttuarisaanikkut pingaarutilimmik aalajangiivugut. Ifab-ip Fifa-llu oqallinneq matunagu maanna tamatuma atulernissaanut siuttunngorput, Fifami præsidentinngorlaaq Gianni Infantino Walesimi Cardiffimi tusagassiortunik katersortitsinermi oqarpoq.
Videokut uppernarsaatit misiligarneqalernissaat suli siumut alloriarneruvoq kukkusumik aalajangiisarnerit unamminermi aalajangiisuusut pinngitsoortinniarlugit, Fifap 2014-imi VM-eqarnerani målinut isertitsinermut uppernarsaatitut teknologiimik atuilernerata kingorna.
Aamma Det Europæiske Fodboldforbundip (Uefa) målinut isertitsinermut teknologii atulernikuuvaa, taannalu atortarniarpaa Champions Leaguemi finalimi, Europa League finalimi ukioq mannalu kingusinnerusukkut EM-eqarnissaani.
Nunani arlalinni arsaarttartut kattuffii oqarsimapput videokut assilisat dommerinit atorneqarsinnaanerat illersorlugu.
Arsaannermi ligat 12-t nalunaarsimapput tamassuminnga misileraanermi peqataarusullutik, periuseq nutaaq tamanna misiligarneqalerpat. Pilersaarutaagallarporli Ifab-ip "ligat tallimat" toqqassagai, ukiuni marlunni video atorlugu aalajangiisarnernut misileraanermi.
Ifab-imi ilaasortaapput Fifa-mi ilaasortat sisamat tuluillu arsaattartunut kattuffiinit sisamanit tamanit ilaasortaq ataaseq.