Videokkut killisiuisarnermut utaqqisarneq sivikillineqassaaq

Meeqqat kinguaassiutimikkut atornerlunneqarsimasut, atortitigut pisinnaappat, ullut arfineq-marluk qaangiutsinnagit videokkut killisiorneqartussaapput. Politiit malittarisassaat taamaapput.

Kisianni utaqqineq amerlanertigut sivisunerujussuusarpoq. Pisumi immikkut ittumi niviarsiaraq qulinik ukiulik Nuummeersoq killisiorneqarnissaminut ulluni 165-ni utaqqisimavoq.

Meeqqat 'taamaallaat' 20-t utaqqisuniitilerniaraat
Maanna Kalaallit Nunaanni politiit utaqqisarnerup sivikilliniarlugu immikkut ittumik iliuuseqarniarput. Tamanna §37 apeqqummut Deborah Kleistimut (IA) akissutigineqartumi atuarneqarsinnaavoq.

Atuaruk: Meeraq ulluni 165-ni videokkut apersorneqarnissaminut utaqqisariaqarsimasoq

- Suliassani taaneqartuni utaqqisarnerup appartinneqarnissaa siunertaralugu Kalaallit Nunaanni Politiit taakkunannga "suligasuartussanik" pilersitsiniarlutik aalajangerput taakkualu video atorlugu killisiorneqartussat amerlassusaat sapaatit akunnerisa amerlanngitsut iluanni suliassanut 20-nut appartinneqarnissaat anguniassavaat, politiit akissummi allapput.

Decembarip qeqqani tamanna anguneqariissaaq.

- Suliassat pisoqaanerit sapinngisamik piaartumik suliarinissaat aamma Kalaallit Nunaanni Politiinit ukkatarineqarpoq, akissummi allapput.

Videokkut killisiuinerit nakkutigineqassasut
Tamatuma saniatigut utaqqisarnerit kingorna sivitsoqqinnginnissaat anguniarlugu, politiit ungasissoq eqqarsaatigalugu suliniuteqarniarput. Tassami politiit nutaanik namminneq sulinerminnut nakkutiginninnermut malittarisassanik suliaqangajalerput.

- Tassunga atatillugu video atorlugu killisiuisarnerit nakkutigineqartarnissaat najoqqutassani immikkut immikkoortortalerneqassaaq, tassanilu politeeqarfinni politi it aqutsisuisa ulluinnarni ingerlatsinerminni video atorlugu killisiorneqarnissamut utaqqisut amerlassusiisa qanoq ilillutik pitsaanerusumik ataatsimut isiginnittalernissaat, qanorlu illugu video atorlugu killisiuinerit isumannaarneqartarnissaasa ukkatarineqarnissaasa qulakkerneqarnissaat isumaliutigineqassaaq.

Nuna tamakkernagu
Tamatuma saniatigut inoqarfinni minnerusuni nunaqarfinnilu piffissaliunneqartoq malinneqarsinnaanngitsoq politiit naqissuserpaat.

- Tamatumunnga atatillugu oqaatigissavara, illoqarfinni nunaqarfinniluunniit video atorlugu killisiuiffiusinnaanngitsuni, nalunaarutigineqartut ilaat immiunneqartarmata. Silamik, atortunik inunnillu angallassinermi periarfissat il.il.eqqarsaatigalugit video atorlugu killisiuinissamut atortunik nassiussiniarneq ullormik ataatsimik periarfissaqarluni qaqutiguinnaq - pisinnaassaguniluunniit - pisinnaasarpoq.

Tamatumunnga aamma pissutaaqataavoq Kalaallit Nunaanni Politiiniit video atorlugu killisiuisussat najukkami politeeqarfinni ulluinnarni ingerlatsinermi suleqataammata, taamaammallu imaaliallaannaq aallartinneqarsinnaanatik.

Kalaallit Nunaanni Politiit videokkut killisiuinernut atortunik arfinilinnik peqarput, taakku Qaqortumi, Tasiilami, Sisimiuni, Aasianni, Uummannami aamma Nuummi inissisimapput. Sisimiuni atortut maanna atorsinnaanngikkallarput.