Video takuuk: Piterarnerani containerit uppissimasut
Tasiilami sakkortuumik anoraasuarujussuartarnerani talittarfimmi containerit arlallit uppissimapput. Ullup sinnera piterassaaq.
Tasiilami maannakkorpiaq piterarpoq. Kommunep allaffia, atuarfik, politeeqarfik suliffeqarfiillu allat arlallit matoqqatinneqarput, innuttaasullu igalaatik assersorsimallugit imminniipput.
DMI-p siusinnerusukkut ilimasaarutigaa piterarnissaa sakkortungaatsiassasoq, ulussaarsuarmiillu sakkortunerungaatsiartumik anoraasuartarumaartoq. DMI Sermitsiaq.AG-mut allappoq naatsorsuutigalugu unnugu piterarnera sakkukilliimiartulissasoq.
Naatsorsuutigisamiit ajunnginneruvoq
Thomas Kristensenip Tasiilameersup anorersuarnera uippallissutiginngilaa. Anorersuarujussuarnerani ilaquttanilu angerlarsimapput.
- Naatsorsuutigisatsinnit ajunnginneruvoq. Sakkortungaatsiartunik anoraasuartareerpoq, piterarli sakkukinneruleriartorpasippoq. Pisut ajornerpaat tassaapput talittarfimmi containerit uppikaammata, Thomas Kristensen oqarpoq.
Uuma ataani takusinnaavat immiussaq Nuka Pivammit facebookimut ikkunneqarsimasoq.
Containerit uppikaasut takuniarlugit Full Screen tuussavat.