Video takuuk: Klondykemiit Sermeq Citymut
Nuummi Entreprenørdalimi illoqarfiup ineriartortinneqarneranut suliniussuaq tamanut tusarniaassutigineqarpoq
Inuussutissarsiortup Martin Sandy Shalmip Nuummi Jagtvejip sinnera inissiaqarfittut inuussutissarsiuteqarfittullu pilerinartunngortillugu allanngortinniarpaa, Kommuneqarfik Sermersuumilu kommunalbestyrelsip illoqarfiup ineriartortinneqarneranut suliniut Sermeq City sapaatip-akunnerini arfineq-pingasuni tusarniaassutigalugu aallarteqqammerpaa, Sermitsiaq allappoq.
– Suliniut illoqarfiup ineriartortinneranut kommunip periusissiaanut pingaarnermut naapertulluarpoq, kommuni tusarniaassummini allappoq.
Martin Sandy Shalmip inissialiornissaq inuussutissarsiorfiliornissarlu kisiisa takorluugarinngilaa, aammattaarli illoqarfiup qeqqani sanaartorfissat ikittut ilaanni illoqarfiup immikkoortuanik namminerluinnaq immikkoorutilimmik pilersitsiniarpoq.
Ukiut arfineq pingasut
– Sermeq City Nuup nutaamik ilisarnaatigilersinnaavaa; timmisartumut ilaasut illoqarfik qulaallugu mittarfissarsuarmut mikkiartuleraangata, umiarsuillu takornariartaatini ilaasut illoqarfiit pingaarnersaata pulammagiaanut piinnavillutik illut takugaangatigit, Martin Sandy Shalmi Sermitsiamut oqarpoq.
Suliniummi, selskabimi Prime View Aps.-imi, Martin Sandy Shalimimit pilersinneqartumi pigineqartumilu tunngavilimmi, pineqarput inissiat 300-t, inuussutissarsiorfiit, biilit uninngasarfii kiisalu immap killinganut pisuttuartarfik. Ullumikkut Entreprenørdali unnukkut sapaatillu akunnerata naanerani inoqarneq ajorpoq, ingerlatalli allat soorlu paaqqinnittarfik, pisiniarfik, neriniartarfik, café, akunnittarfik kulturikkullu neqeroorutit Sermeq Citymi ilanngunneqarsinnaapput, taamaalilluni illoqarfik eqeersimaartoq ulloq unnuarlu akunnerni sapinngisamik amerlanerpaani pilersinneqarsinnaalluni.
Pilersaarutip tamarmiusup piviusunngortinneqarnissaa ukiunik arfineq-pingasunik sivisussuseqassaaq 900 millioner koruuninillu akeqassalluni, sanaartugassallu 36.145 kvadratmeterinik annertussuseqassapput.
Youtubekut illussanik titartaasarfiup E+N Arkitektur A/S-ip illoqarfiup immikkoortortaavanut, Nuummi Jagtvejip isuaniittumut uani videot takukkit:
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: