Video takuuk: Kalaallit atugarliortut Christiansborgimi oqallisigineqartut

Danmarkimi isumaginninnermut ministeri Karen Ellemannip (V) sisamanngornermi Christiansborgimi tusarniaanermi naqissuserpaa, Kalaallit Nunaat aamma Danmark, kalaalerpassuit Danmarkimut nuukkaangamik ajornartorsiutigisartagaat iliuuseqarfiginissaannut ataatsimut akisussaaffeqartut.

Atuaruk: Aaja, Aleqaanngitsoq tusarniaanissamik siunnersuuteqartuuvoq

Illuanilli ministerimit piviusunik neriorsuuteqartoqanngilaq.

Peqataatitsineq nukittunerusoq
Tusarniaaneq Folketingip Kalaallit Nunaat pillugu ataatsimiititaliaanit aaqqissuunneqarpoq, kalaallillu Danmarkimiittut peqataatinneqartarnerat nukittorsarnissaa sammineqarpoq.

Inuit Aqatatigiit folketingimut ilaasortaatitaata, Aaja Chemnitz Larsenip, tusarniaaneq piumasaraa, ilaatigullu Danmarkimi innuttaasunik ataatsimiititsinernik ilaqarpoq, tassanilu aamma Siumup folketingimut ilaasortaatitaa Aleqa Hammond peqataavoq.

Nuna tamakkerlugu iliuusissatut pilersaarut
Aaja Chemnitz Larsenip tusarniaanermi IA Folketingimip tassunga tunngatillugu nuna tamakkerlugu iliuusissamik pilersaarut saqqummiuppaa - Venstrep naalakkersuisuutitaqartut nammineerlutit naalakkersuisuunerminnut tunngaviannut naleqqiussinertalerlugu, taanna aamma kalaallit peqataatinneqartarnerannut nukittorsaanissamik oqariartuuteqarpoq, kiisalu kalaallit Danmarkimi atugarliortut atugaat pitsanngorsarnissaat.

Qaninnerusut
- Akuttunngitsumik takutinneqartarpoq, kalaallit Danmarkimiittut annertunerujussuarmik atugarliortunngornissaminnut Danmarkimi eqimattanit allanit qaninnerusartut. Aaqqiissuteqarnissamullu politikkimik, partii politikkimiunngitsoq pisariaqartitsisoqarpoq, Aaja Chemnitz Larsen oqarpoq, ilaatigullu tikkuartorpaa kalaallit Danmarkimut nuuttartut ajornartorsiornermik nalaataqartartut.

Tassani nalunaarusianut marlunnut pineqartumi oqaluuserineqartunut tunngavilersuivoq, ilaatigut nalunaarusiaq ‘Ligebehandling af grønlændere’ Institut for Menneskerettighedimeersoq, ilaatigullu nalunaarusiaq ’Grønlændere i Danmark, en registerbaseret kortlægning’ Det Nationale Forskningscenter for Velfærdimeersoq.

Peqatigiiffiit nersualaarai
Karen Ellemann oqalliseqataasuni siulliulluni saqqummiivoq.

Ministerip kalaallinut eqimattanut artornartumik nuunnerminni aallartittartunut, kiisalu eqimattanut atugarliortunut Danmarkimiittunut tapersersuinini nalunaarutigaa. Aammalu peqatigiiffiit innuttaasunut taakkununnga eqimattanut pitsanngorsaaniarlutik ulapputeqartut nersualaarpai.

Taassuma naalakkersuisoqatigiinnerminnut tunngavitsik tikkuarpaa, naalakkersuisut peqatataatitsinermut ajornartorsiut pimoorullugu isiginiaritsik.

Illuanillu Namminersorlutik Oqartussanut akisussaaffik annertusivaa, taakkununnga kalaallinut eqimattanut Danmarkimi atugarliortunut iliuuseqarnermut tunngatillugu.

Atuaruk: Kalaallinut Danmarkimiittunut iliuusissamik nutaamik saqqummiisoq

Immikkut ittunik pisinnaatitaaffeqanngitsut
Institut for Menneskerettighedip siunnersuutigisaatut, kalaallit Danmarkimiittut inuiaat ikinnerussuteqartutut akuersaarneqarnissaannut apeqqummut oqarpoq:

- Kalaallit Nunaanni Danmarkimut nuunneq ajornartorsiorfiunnginnerpaatinnissaa, ataatsimut akisussaaffiuvoq.

Ministerip isummani, naalagaaffeqatigiit innuttaasui assigiinnik pisinnaatitaaffeqarnissaat tunngavilersorpaa, taamaammallu Namminersorlutik Oqartussanik qanimut suleqateqarnissaq orniginartinnerullugu - inuiaat ikinnerussutilittut immikkut pisinnaatitaaffeqalersiinnarnagit.

Aqutsisoq inuummarissoq
Oqallinnermi aqutsisoq inuummarillunilu piareersarluarsimavoq, tusagassiortoq Vibeke Hartkorn, taanna aperivoq, pinaveersaartitsinissamut aningaasaliissutit kiisalu peqataatitsinermut nukittorsaanissamut aningaasanut inatsimmut ilanngunneqarsinnaannginnersut - aningaasat isumaqatiginninniutigineqartarnerannut taarsiullugu.

Neriorsuuteqanngitsoq
Ministerili neriorsuuteqanngilaq.

- Tapiissutit isumaqatiginninniutigineqartartussaapput, aningaasanut inatsit utaqqiisaasumik aaqqiissutaannaavoq. Kalaallit folketingimut ilaasortat isumaqatiginninniummut saqqummiussinissaat qilanaaraarput, Karen Ellemann oqarpoq.

Allaaserisap ataatungani video takuuk, Folketingip Kalaallit Nunaat pillugu ataatsimiititaliaanut ilaasortat tamarmik tusarniaarnermut peqataapput