Katersuiniarneq
Video: Nipilersortartut kræftimut akiuiniarnermut tapersersuisut
Nipilersortartup Hans Jukku Noahsenip kræftimik nappaateqartut tapersersorniarlugit kræftimut akiuiniarfimmut Neriuffimmut tapersersuivoq
Hans Jukku Noahsenip taalliaa inuulluaqqussut 'Aallaleruma' iTunesimut ikkunneqassaaq. Isertitarineqartut tamaasa kræfti akiorniarlugu suliniarfimmut Neriuffimmut tunniunneqassapput.
Hans Jukku Noahsenip 'Aallaleruma' ukiut tallamat qaangiupput sanaarimmagu, nipilersortartullu Svend Åge Hansen (Ungaaq), Nina Kreutzmann Jørgensen, Pilu Noahsen, Siiva Fleischer, Anda Uldum, Mike Fencker Thomsen kiisalu Albrecht Damgaard suleqatigalugit taallaq immiullugu.
Nalunngisat qimaguttut
- Neriuffimmut tapersersuinissamut eqqarsaat nutaajuvoq. Nalunngisakka arlaqartut kræftimik nappaateqarlutik toqukkut qimagunnikuupput, tamannalu malugusuutigisimaqaara. Neriuutigaaralu taalliara tunisaqarluarumaartoq, Hans Jukku Noahsen Sermitsiaq.AG-mut oqarpoq.
Taallaq arfininngormat nuna tamakkerlugu aningaasanik katersuiniartoqarnerani toqqaannartumik takutinneqaqqaarpoq, aallakaatitaq KNR-TV-mi takutinneqarpoq.
- Taallaq Facebookkikkut tigulluarneqaqaaq, oqariartuutaalu pikkugineqarluni, Hans Jukku Noahsen oqaluttuarpoq.
Nunatsinni Nakorsaaneqarfimmit nalunaarutigineqarpoq nunatsinni inuit 195-it ukiumi 2011-mi kræftimik nappaateqartut, kisitsillu nalunaarusiat kingullersaraat. Inuit ilaasa nappaammit katsorsarneqareernemi kingorna iluarsisarput ilaallu toqukkut qimaguttarlutik.
- Eqissinnaatilluta eqittassaagut, erinarsortartut pikkorissut ilaatigut 'Aallaleruma'-mi erinarsorpaat.