Facebookimi nanisiaq
Video: Nick aamma inuppassuit allat immamut pissittut
Nunatsinni Facebookeqartut imminnut unammillereernermi kingorna imaanut pissittut amerlapput, ilaatugut aamma naalakkersuisoq Nick Nielsen pinnguaammut nuannaartorineqartumut ilaavoq
Inuppassuit imarmut nilleqisumut pissikaasut amerlapput.
Inuppassuimmi Facebookimi unammillereernermi kingorna imarmut nilleqisumut pissittut amerlapput, pissinnertillu videoliarereernermi kingorna Facebookiminnut ikkuttarlugu.
Unammillertut piumanngikkaangata 'ajortsartut' immiaaqqanik pillinngikkunik, sodavandillinngikkunik viinnillertarput, unammillertumullu tunissutigisarlugit.
Ilinniartitaanermut, ilageeqarnermut, kultureqarnermut naligiissitaanermullu naalakkersuisoq Nick Nielsen Siumumeersoq, unammillerneqareernermi kingorna sapaatiummat imaanut pissippoq.
- Imaq nillertorujussuuvoq. Nillingaarmat pissikkusunngikkaluarpunga. Arpaqqammerama imaanut pissinnginninni kiaguppunga, qujanartumik qilusuunngilanga imaaniinninni, sivikitsuinnarmimmi aamma imaaniippunga, Sermitsiaq.AG-mut oqaluttuarpoq.
- Imaanut pissinnera assigiinnarpaa soorlu ukiuunerani nalunnguarluni, oqarpoq.
Siumumit politikkerip nalunngisani pingasut imaanut pississasut unammillerpai, taamaaliussanersullu pissangagaa.
Pingaaruteqarpoq
- Imaanut pississagaanni pingaaruteqarpoq sivikitsuinnarmik imaaniinnissaq. Aamma allamik eqqaaniittoqarnissaa pingaaruteqarpoq, Nick Nielsen oqarpoq.
DMI-mi takuneqarsinnaanngilaq nunatta imartaa qanoq nillertiginersoq. Nuummili sila pingasunik kiappoq.
Imaanut pissittarneq nuannaartorineqartoq Cultimit aallartinneqarpoq, imeruarsaat Culti paaralugu imaanut pissinnermi 'Go' energi vinder altid' nilliasoqartarluni. Imaanut nillertumut pissereernermi kingorna Facebookimut videonngorlugu imaanut pissinneq ikkunneqartarluni.
Politiit tamanna qanoq oqaaseqarfigineraat Sermitsiaq.AG-mit allaaserineqassaaq.
NANGITSINEQ: Facebookikkut unammisaqattaarut politiit sakkortuumik mianersoqqussutigaat
Nick Nielsen imaanut pissittoq ataani takuneqarsinnaavoq